ՌԴ-ն ու ՀԱՊԿ-ն պետք է հաշվի նստեն մեր դիրքորոշման հետ.Կ. Նահապետյան

ԱԺ պաշտպանության, ազգային անվտանգության և ներքին գործերի մշտական հանձնաժողովի և ՌԴ Դաշնային խորհրդի պաշտպանության և անվտանգության կոմիտեի համատեղ նիստին հաջորդած ճեպազրույցում ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը հայտարարեց.«Այն բացատրությունը, թե Ադրբեջանը կարող է զենք ձեռք բերել այլ պետություններից և ոչ միայն Ռուսաստանից, որևէ կերպ հիմնավորում չի կարող լինել այն լրջագույն մտահոգությանը, որ կա Ռուսաստանի կողմից Ադրբեջանին զենք վաճառելու փաստի վերաբերյալ:Հայաստանը բացեիբաց և բոլոր ատյաններում մշտապես հայտարարել է, որ հանդիսանում է Լեռնային Ղարաբաղի անկախության և անվտանգության երաշխավորը: Եվ կարծում եմ՝ մեր գործընկերները՝ և Ռուսաստանը, և ՀԱՊԿ անդամ մնացած բոլոր պետությունները, պետք է հաշվի նստեն մեր այդ դիրքորոշման հետ: Եվ միշտ այդ մասին հայտարարվել է, որ այն հարձակվողական զենքը, որ վաճառվում է Ադրբեջանին, ինչ-որ մի պահի օգտագործվելու է. սպառազինության  կուտակումը առաջ է բերելու նաև ռազմական հավասարակշռության խախտում, իսկ թեկուզև աննշան խախտումը հղի է անկանխատեսելի և ծանր հետևանքներով ՝ ոչ միայն տարածաշրջանային պետությունների համար, այլ նաև ՌԴ համար, որովհետև ՌԴ-ն այս տարածաշրջանում ունի իր գերակա շահերը և այդ իմաստով մենք պետք է քաջ գիտակցենք, որ նման զենքի վաճառքն առաջ էր  բերելու այնպիսի ծանր հետևանքներ, որ ունենք այսօր»: Առաջին հերթին հարկավոր է նկատի ունենալ, որ Հարավային Կովկասում ռազմաքաղաքական իրավիճակն ունի տարբեր բաղադրիչներ և չհասկանալ այդ բաղադրիչները ուղղակի  անհեթեթ մոտեցում է,հավելեց նա: