Հենց դասակային խորության մեջ են եղել մարտական գործողությունները.Ս.Օհանյան

«Պաշտպանության բանակում մարտը մղվել է հենց առաջին շարակազմում, առաջին դիրքի խորությամբ՝ 2, 2.5 կիլոմետր, ընդ որում՝ դասակային խորությունից ավել մարդկային շարժ տեղի չի ունեցել: Հենց դասակային խորության մեջ են եղել մարտական գործողությունները, և այդ ժամանակահատվածում կիրառվել են այն միջոցները, որոնք այդտեղ ահրաժեշտ են եղել:Հակառակորդը փորձել է մինչև 30 ուղղություններով ներթափանցում իրականացնել, սակայն այդ փորձերը տապալվել են»,-«Հանրային հեռուստաընկերությանը» տված հարցազրույցում ՝ խոսելով Ադրբեջանի կողմից վերջին օրերին սանձազերծված լայնածավալ ռազմական գործողությունների մասին, ասել է ՀՀ պաշտպանության նախարար Սեյրան Օհանյանը: « Քառօրյա պատերազմում պաշտպանության բանակի համապատասխան ռեզերվներին, որոնք նախատեսված են ավելի գլոբալ խնդիրներ լուծելու համար, ձեռք չի տրվել: Մենք ունենք չկիրառած զինատեսակներ, որոնց մասին հակառակորդն անգամ երազել չի կարող: Մեր սպառազինությունն անընդհատ թարմացվում, արդիականացվում է: Իհարկե, նոր սպառազինությունների կարիք էլ ունենք, որոնց ձեռքբերման ուղղությամբ աշխատանքներ են տարվում»,-ասել է նա և հավելել . «Ոչ մի ռազմավարական դիրք հակառակորդին հանձնված չէ: Այդ 400-500 մետր շարժը, որի մի մասն իրենց կողմից է եղել, մյուս մասը՝ մեր, չպահվող, մեզ համար էական նշանակություն չունեցող դիրքեր են, պարզապես մանեւրելու համար են: Դիրքերի մեծ մասը մեր առաջին գծում կանգնած զինծառայողների խելացի հակահարվածների շնորհիվ վերականգնվել են»: