Ականները պայթեցին.ովքեր են ընդդիմության դիմակի տակ թաքնված իմքայլականները

Երբ խորհրդարանական ընտրություններից հետո շատերն արձանագրում էին, որ հեղափոխական Հայաստանի խորհրդարանում չկա ընդդիմություն, Լուսավոր եւ Բարգավաճ Հայաստան կուսակցությունները ձեւական ներկայություն են ապահովում, քանզի նրանք ինչ-ինչ հանգամանքներից ելնելով չեն կարող անկախ գործունեություն ծավալել, Էդմոն Մարուքյանը՝ Նիկոլ Փաշինյանի հետ նախկինում ունեցած հարաբերությունների, Գագիկ Ծառուկյանը իր կարգավիճակի պատճառով, ուժգին դիմադրության էին հանդիպում հասցեատեր ուժերից: ԱԺ-ում առաջին փորձությունը, սակայն, ցույց տվեց, որ այդ արձանագրումները իրական են, մի բան էլ ավելի: Եեթե նախկինում ընդդիմադիրները քողարկված էին Սերժ Սարգսյանի գրպանային ընդդիմության կարգավիճակը պահում եւ ամեն ինչ անում ընդդիմություն երեւալու համար, ապա նոր Հայաստանում ընդդիմադիր պատգամավորներն այնպիսի ելույթներ են ունենում, որ իշխանականները երկու ձեռքով ծափահարում են այդ պատգամավորին: Հասկանալի է, որ փորձությունը ՍԴ դատավորի ընտրությունն էր, իսկ պատգամավորը Մարուքյանի թիմակից Արման Բաբաջանյանը:
Մինչ նրա ելույթին անդրադառնալը ընտրության արդյունքները փաստեցին, որ խորհրդարանում ավելի քան մեկ տասնյակ ընդդիմադիր պատգամավոր ցանկացած պահի կարող է պարել այն նվագի տակ, որը իշխանությունն է զարկելու: 88 հոգանոց իշխող խմբակցության պարագայում Վահե Գրիգորյանը ստացավ 99 կողմ ձայն: ԲՀԿ-ից եւ ԼՀԿ-ից հաշված պատգամավորներ փորձեցին փրկել կուսակցության դեմքը քիչ, թե շատ ընդդիմադիր ելույթներ ունենալ, բայց քվեարկությունը ցույց տվեց, որ դա փարիսեցիություն է: Ստացվում է, որ ընդդիմադի ուժեր որպես այդպիսին խորհրդարանում գոյություն չունեն, կա մի խմբակ, որը կոչվում է ընդդիմություն, բայց այստեղ մարդիկ գաղափարական սկզբունքային տարբերություններ ունեն եւ տարբեր իրավիճակներում կարող են տարբեր դիրքորոշումներ ունենալ:
Դիցուք Արման Բաբաջանյանը Վահե Գրիգորյանի թեկնածության քննարկման ժամանակ ասաց, որ այսօրվա քվեարկությունից է կախված լինելու ՀՀ-ում դատաիրավական բարեփոխումների ընթացքն ու ճակատագիրը. «Միեւնույն ժամանակ պետք է արձանագրել, որ դատական համակարգում ստեղծված այս իրավիճակը իշխող ուժի մեկամյա անգործության եւ արխայնության հետեւանք է»: Բաբաջանյանի խոսքերով. «Այսօր այս Ազգային ժողովի, մեր բոլորի պարտականությունն է ավելի քան 20 տարի առաջ մեր երկրում բույն դրած քրեաօլիգարխիկ համակարգին սպասարկող դատական իշխանություն կոչվող որջը վերադարձնել ժողովրդին եւ ամեն ինչ անել, որ դատական իշխանությունը որոշումները կայացնի հանուն Հայաստանի հանրապետության»: «Լուսավոր Հայաստան» խմբակցության մեկ այլ պատգամավոր Տարոն Սիմոնյանն իր խմբակցության անունից ելույթում ասաց, որ ՍԴ դատավորի թեկնածու Վահե Գրիգորյանի թեկնածության առաջադրման վրա աչք փակել հնարավոր չէ, քանի որ այն հակասահմանադրական է։ Սիմոնյանի խոսքերով՝ եթե ցանկանում են իրենց ընդգծված ցանկալի թեկնածուին ընտրեն ինչ-որ պաշտոնում, պետք է խիստ հաշվարկով մոտենան՝ հասկանալու որ դատական համակարգն այլ համակարգ է, Սահմանադրական դատարանին առաջադրվող պահանջներն՝ այլ, ընտրության ճանապարհն՝ այլ. «Եթե տեսնում էիք, որ Սահմանադրականության հետ կապված խնդիր կա, դուք քաղաքական մեծամասնություն եք, կարող էիք օրենքում փոփոխություն կատարել»: Սիմոնյանն ասաց՝ եթե գտնում էին սահմանադրականության խնդիր կա, ապա տանեին ՍԴ. «Բայց անտեսել այս պահանջը եւ առանց դրա գնալ քաղաքական որոշման, մեր կարծիքով լավագույն ճանապարհը չէ դեպի իրավական պետության»: Տարոն Սիմոնյանն ասաց, որ կարելի էր սպասել մեկ տարի եւ կա համապատասխան հնարավորություն հաջորդ տարի ներկայացնել թեկնածու՝ առանց օրենքի խախտման. «Բոլոր տարբերակներից ընտրվել է վատագույնը, եւ ինչքան էլ պարոն Գրիգորյանի մասնագիտական ունակությունները, նրա անձը եւ նրա անցած ճանապարհը գնահատենք, ես եւ իմ գործընկերների շատերը չեմ կարող անտեսել օրենքի պահանջը: Ես էլ. Եմ ընտրում վաղը, իմ գործընկերներն էլ են ընտրում վաղը»: Կամ նույնպիսի ջախջախիչ ելույթ ունեցավ ԲՀԿ-ական Գեւորգ Պետրոսյանը, իսկ նրանից հետո Արման Աբովյանը փորձեց սուր անկյունները հարթել, ասել, թե ամենափայլուն նախագիծն էլ իրենք քննադատելու են, քանզի եթե չլինեն կարծիքներ, քաղաքականությունը կդադարի գոյություն ունենալ: Իրականում արդեն դադարել է, մի երկրում, երբ խորհրդարան կառավարման մոդելն է գործում, բայց խորհրդարանը զուրկ է որակյալ ընդդիմությունի, այնտեղ քաղաքականության մասին խոսելը քաղաքական անմղսունակություն է:

Անի Սահակյան