Համախմբումն իշխանության, Նախագահի շուրջ շատ կարևոր էր. Հերմինե Նաղդալյան
«Հանրապետական» կուսակցության գործադիր մարմնի այսօրվա նիստից հետո լրագրողների հետ հանդիպման ընթացքում ԱԺ փոխնախագահ Հերմինե Նաղդալյանը հայտնեց, որ նիստի ընթացքում քննարկվել են ներկուսակցական, ներքաղաքական հարցեր, նաև անդրադարձել են պատերազմական վիճակին վերաբերող հարցերին: «Այս օրերին բոլոր քաղաքական ուժերի միահամուռ աջակցությունն ու համախմբումն իշխանության, Նախագահի շուրջ շատ կարևոր էր: Պետք է աշխատենք, պետք է ձգտենք, որ այդ միասնականությունը շարունակվի և պահպանվի ներքաղաքական գործընթացների ընթացքում»,-ասաց Հերմինե Նաղդալյանը: Անդրադառնալով Ռուսաստանի Դաշնության փոխվարչապետ Դմիտրի Ռոգոզինի հայտարարությանը՝ Հերմինե Նաղդալյանն ասաց, թե դրա վերաբերյալ լավագույն պատասխանն այն է, թե ինչ կատարվեց այդ հայտարարության մեկ ժամվա ընթացքում. «Ընդամենը մեկ ժամ հետո այդ հայտարարությունը տվյալ էջում այլևս զետեղված չէր, ջնջված էր, լավագույն վկայությունն է, թե ինչպես է այդ հայտարարությունն առաջին հերթին ընկալվել հենց բուն Ռուսաստանում, ապա՝ Հայաստանում»:
Հետևեք մեզ Viber-ում
