Չեխիայի հայերն` ընդդեմ ադրբեջանական սադրիչ գործողությունների
Չեխիայի հայկական համայնքը ապրիլի 16-ին Պրահայում կանցկացնի բողոքի ցույց` ընդդեմ Ադրբեջանի սադրիչ գործողությունների:
Բողոքի ցույցը նախաձեռնել է «Ուրարտու հայ չեխական միություն»-ը: Միության նախագահ Ալեքսանդր Սարգսյանը«Արմենպրես»-ին տեղեկացրել է, որ իրենց միացել են տեղական 10 այլ հայկական կազմակերպություններ: Բողոքի ակցիան անցկացվելու է Պրահայի Ստառոմեստսկի հրապարակում: Ակցիայի նպատակն է միջազգային հանրության ուշադրությունը սևեռել Ադրբեջանի կողմից սանձազերծած ռազմական գործողություններին:
«Վայրը պատահական չէ ընտրված, այդ հրապարակը միշտ աչքի է ընկնում մեծ թվով զբոսաշրջիկների այցելությամբ: Մենք մեր բողոքի ձայնն ենք բարձրացնելու Ադրբեջանի սադրիչ գործողությունների հետ կապված: Պետք է միջազգային հանրությունն արժանի գնահատական տա Ադրբեջանի քայլերին»,-ասել է Ալեքսանդր Սարգսյանը: Բողոքի երթի մասնակիցները հրապարակից շարժվելու են դեպի Եվրախորհրդարանի ներկայացուցչություն և Չեխիայում ՌԴ դեսպանատուն: «Մեր պահանջն է նախ դադարեցնել զինել ագրեսորին: Նրանք, ովքեր զենքերը վաճառում են Ադրբեջանին, մի օր կրակելու են հենց իրենց ուղղությամբ: Այս և նման այլ լոզունգներով մեր բողոքի ձայնն ենք բարձրացնելու Ռուսաստանի դեսպանատան մոտ: Եվրախորհդից էլ պահանջելու ենք իրերը կոչել իրենց անուններով, բարձրաձայնել, թե ով է նախաձեռնողը և համարժեք գնահատական տալ»: Հայկական համայնքը ղարաբաղա-ադրբեջանական շփման գծում տիրող իրավիճակի վերաբերյալ նամակ է ուղարկել իշխանության տարբեր ճյուղերի ղեկավարներին:
Հետևեք մեզ Viber-ում
