Պետք է պատասխան տան.«Հրապարակ»

Լրագրող, «Բանակն իրականում» խմբի ակտիվիստ Ծովինար Նազարյանը, որի եղբայրը ողբերգորեն զոհվել է բանակում, «Հրապարակին» մի գրություն է ուղարկել․ «Քառօրյա պատերազմի հետեւանքով՝ տասնյակ կյանքերի գնով, վերջապես լայն հասարակությանն էլ տեսանելի դարձավ, որ սահմանի ողջ երկայնքով կանգնած են սոցիալապես անպաշտպան ընտանիքների զավակներ, որ ոչ միայն զինվորները պետք է հայրենիք պաշտպանեն, այլեւ հայրենիքն է պարտավոր պաշտպանել նրանց։ Բայց վիճակագրական այդ պատկերը հուշում է, որ պաշտպանված են միայն ունեւոր եւ կապեր ունեցող ընտանիքների զավակները։ Ինչքան էլ պնդեն, որ զորակոչն անցկացվում է վիճակահանությամբ, դա չի բացատրում, թե ինչու սահմանից որեւէ, թեկուզ դրական կամ չեզոք լուր չի գալիս, որի հերոսը հայտնի անձանց կամ ունեւորի որդի է։ Թերեւս միակ բացատրությունն այն է, որ նրանք պարզապես չեն մասնակցում զորակոչին։ Պայմանագրային հիմքով ծառայող սպաներից շատերը բարձրագույնն ավարտած, իրենց մասնագիտությամբ աշխատանք չգտած մարդիկ են, այսինքն՝ խնդիրը համակարգային է եւ ոչ միայն բանակին է վերաբերում։ Այս պատերազմը բացահայտեց բաներ, որ մենք ահազանգում էինք ու արձագանք չէինք գտնում։ Տարիներ շարունակ Սերժ Սարգսյանն իր նախընտրական քարոզչությունը կառուցում էր այն փաստարկի վրա, թե տնտեսապես լավ չենք ապրում, քանի որ նյութական միջոցներն ուղղում ենք բանակին։ Հիմա արդեն նույնիսկ ձեւացնել հնարավոր չէ, որ դա սուտ էր։ Հիմա պետք է բոլոր պաշտոնյաներն իրենց բոլոր թերացումների համար պատասխան տան՝ քրեական գործեր պետք է հարուցվեն, քաղաքական հնչեղ հրաժարականներ լինեն․․․ այն բանի համար, որ անապահով ընտանիքների զավակների կյանքի հաշվին գումարներ են գրպանվել, որոնք կարող էին ու պիտի ուղղվեին բանակի բարեփոխմանը»։ Մանրամասները՝ թերթի այսօրվա համարում։