Թուրքիայում ՌԴ դիվանագետներին արգելեցին

  Ստամբուլում ՌԴ-ի Գլխավոր հյուպատոս Անդրեյ Պոդելիշեւը «ՌԻԱ Նովոստիին» հաստատել է թուրքական ԶԼՄ-ների տեղեկությունները ձերբակալված երկու ռուսաստանցու մասին: «Մենք ձերբակալության մասին դեռեւս կիրակի օրն ենք իմացել: Այդ նույն օրը հյուպատոսը հանդիպել է նրանց, խոսել հետները: Երկուշաբթի նա մասնակցել է նախնական լսումներին, բայց անմիջապես նիստին նրան թույլ չեն տվել ներկա լինել: Թերթերից դատելով` նրանց սպանությանը հանցակցության մեղադրանք է ներկայացվել: Բայց ոստիկանությունը չի հաղորդել ներկայացված մեղադրանքների էության մասին: Մեզ հայտնեցին   (ձերբակալվածները), որ իրենք այստեղ են եկել որպես զբոսաշրջիկներ եւ համապատասխանաբար ժխտում են իրենց հասցեին ցանկացած մեղադրանք կարգը խախտելու կամ էլ այլ հակաօրինական արարքներ կատարելու վերաբերյալ», — ասել է գործակալության զրուցակիցը: Ստամբուլում ռուսական դիվանագիտական առաքելության ղեկավարի խոսքով, գլխավոր հյուպատոսությունը կհետեւի գործի ընթացքին եւ կպաշտպանի Ռուսաստանի քաղաքացիների իրավունքները: «Նրանք փաստաբան ունեն, մենք նրանց հետ կապ ենք պահպանում եւ մտադիր ենք հետեւել նրանց իրավունքների եւ շահերի պահպանությանը: Նրանք իրենց պահելու պայմաններից չեն բողոքում: Դատարանի որոշմամբ, նրանք Թուրքիայում կմնան մեկ ամիս եւ կպահվեն խիստ հսկողությամբ», — ասել է գլխավոր հյուպատոսը: Պոդելիշեւը հավելել է, որ ռուսաստանցիները գտնվում են Ստամբուլի Մալթեպեի շրջանի պատժիչ հաստատությունում: Ավելի վաղ թուրքական ԶԼՄ-ները հայտնել էին, որ Ռուսաստանի երկու քաղաքացին, որոնք անցյալ ուրբաթ թուրքական հատուկ ծառայությունների գործողության ընթացքում ձերբակալվել են Ստամբուլում, կալանքի են առնված լրտեսական գործունեության մեջ կասկածով: Թուրքական հատուկ ծառայություններում աղբյուրի տեղեկությունների համաձայն, ՌԴ-ի քաղաքացիներ Յուրի Անիսիմովը եւ Ալեքսանդր Սմիրնովը կասկածվում են նաեւ ծագումով Չեչնիայից Աբդուլվահիդ Էդիլգերիեւի սպանությանը մասնակցության մեջ, որը տեղի է ունեցել անցյալ տարվա նոյեմբերին: Հաղորդվում է, որ ռուսաստանցիներից առգրավվել են կեղծված փաստաթղթեր, որոնցով նրանք իբր մուտք են գործել Թուրքիա, իսկ քննիչների հարցերին հրաժարվում են պատասխանել: