Փողերը փախչում եմ

ԿԲ նախագահ Արթուր Ջավադյանը հայտարարել է, որ 12-ամսյա գնաճը կլինի 3 տոկոսի սահմաններում և դա բավականին ցածր ցուցանիշ է։ Ջավադյանի կարծիքով` հենց հիմա ավելի շատ սեզոնային գնանկում կա։ <<Այս պահին ոչ թե սպառման ծավալներն են նվազել, այլ սպառման ծավալների աճի տեմպը»,- ասել է նա։
Հարցին, թե մարդկանց եկամուտների աճ կա՞, ԿԲ նախագահը պատասխանեց․ «Իհարկե, մարդկանց եկամուտներն աճում են։ Դրա մասին մեր Վիճպետկոմը հրապարակումներ է արել։ Եվ վարկավորման ծավալների աճերն էլ հենց դրա մասին են խոսում։ Մենք գնահատումներ ենք անում վարկավորման վերաբերյալ և շատ շուտով կհրապարակենք։ Եվ ամենամենակարևորը՝ խարսխվել են ցածր գնաճային սպասումներ։ Ժամանակակից տնտեսագիտության մեջ ամենակարևոր խնդիրը հենց սպասումներ են՝ տնտեսական աճի, գնաճի»,- հավելեց նա։
Անդրադառնալով մասնագետների այն պնդումներին, թե առանց գնաճի տնտեսությունը չի զարգանա, ԿԲ նախագահը պատասխանեց․ «Էդ ուրիշ գնաճ նկատի ունեն, այդքան գնաճ մենք ունենք։ Բայց բարձր գնաճը սարսափելի հիվանդություն է, որը խոցում է հիմնականում ամնապահով խավերին։ Եվ բարձր գնաճի դեմ պայքարելը բավական բարդ ջանքեր է պահանջում»։
Ինչ վերաբերում է 2019-ի տնտեսական աճին` կենտրոնական բանկի կարճաժամկետ կանխատեսումներով այն կգտնվի 4.6-6.1 տոկոս միջակայքում: «Մեր կարճաժամկետ կանխատեսումների համաձայն՝ 2019-ին տնտեսական աճին հիմնականում նպաստելու է մասնավոր սպառումը: Մասնավոր սպառման բարձր աճին հիմնականում նպաստելու է բիզնեսին տրված վարկերի աճի համեմատ տնային տնտեսություններին տրված վարկերի առաջանցիկ աճի տեմպը »,-ներկայացրել է Ջավադյանը:
Նրա խոսքով՝ ակնկալվում է ներդրումների ավելի համեստ աճ՝ պայմանավորված 2018-ին գրանցված բարձր աճով, որը բազային ազդեցությունը ունի 2019-ի ներդրումների աճի ցուցանիշների վրա: Տնտեսական աճի վրա մյուս երկու տարրերի՝ զուտ արտահանման և հարկաբյուջետային քաղաքականության ազդեցությունը տարվա ընթացքում կլինի որոշակի զսպող՝ պայմանավորված արտահանմանը զուգահեռ նաև ներմուծման աճի տեմպերով և պետական բյուջեի պակասորդի կրճատմամբ:
ԿԲ նախագահը հերքել է նաև վերջին շրջանում փողերի արտահոսքի մասին լուրերը. «Ներհոսքը գնալով ավելանում է, արտահոսքի մասով էլ մենք բավականին ուշադիր ենք: Որոշակի աճ կա, որը զուգակցվում է ներհոսքի աճի հետ»: ՍԱ այն դեպքում, երբ Արթուր Ջավադյանի գլխավորած հիմնարկի` ԿԲ-ի հաշվետվությունի համաձայն` 2018թվականին միայն բանկային համակարգով Հայաստանից դուրս է բերվել շուրջ 1,2 մլրդ դոլար։ Տարբեր գնահատականներով` քաղաքացիները միայն բանկային համակարգով ամսական շուրջ 100 մլն դոլար են դուրս հանում երկրից։ Նախկինում երբևէ ֆիզիկական անձանց միջոցով այդքան տարադրամ դուրս չի բերվել Հայաստանից։

Հայկ Դավթյան