Ի՞ նչ ճակատագիր կունենան գյուղնախի կրճատվող քաղծառայողները

Կառավարությունը փոփոխություն է կատարում «Պետական կառավարման համակարգի մարմինների մասին» 2018 թվականի մարտի 23-ին հաստատված օրենքում: Համապատասխան որոշումն ընդգրկված է մայիսի 30-ի ՀՀ կառավարության նիստի օրակարգում: Ի սկզբանե, նախատեսվում էր, որ ՀՀ գյուղատնտեսության նախարարության սննդամթերքի անվտանգության պետական ծառայության աշխատակազմի (այսուհետ՝ Ծառայություն) քաղաքացիական ծառայողները շարունակում են պաշտոնավարել մինչև սննդամթերքի անվտանգության տեսչական մարմնի անվանացանկի և քաղաքացիական ծառայության պաշտոնների անձնագրերի հաստատումը: Որպես այս գործընթացի ավարտի ժամկետ նախանշված էր մինչև 2018 թվականի սեպտեմբերի 30-ը ներառյալ:
«Չնայած նշված ժամկետը ավարտվել է, սակայն քաղաքացիական ծառայողները շարունակում են պաշտոնավարել, քանի որ «Քաղաքացիական ծառայության մասին» ՀՀ օրենքով նախատեսված չէ վերջիններիս ազատումը ժամկետի ավարտման հիմքով:
Բացի այդ, անվտանգության նկատառումներից ելնելով՝ ոլորտում անհրաժեշտ է ապահովել պատշաճ վերահսկողություն, այդ թվում՝ անընդմեջ սահմանային:
Հաշվի առնելով սննդամթերքի ոլորտում անվտանգության ապահովման շարունակականության անհրաժեշտությունը, ինչպես նաև քաղաքացիական ծառայողների իրավունքների պաշտպանվածության հարցը՝ վերջիններս շարունակում են պաշտոնավարել»,- նշվում է նախագծի հիմնավորման մեջ` արձանագրելով, որ իրավիճակից ելնելով առաջարկվում է իրավական կրագավորումները համապատասխանեցնել:
Ուստի առաջարկվում է «Պետական կառավարման համակարգի մարմինների մասին» 2018 թվականի մարտի 23-ի օրենքի 9-րդ հոդվածի 8-րդ մասը շարադրել նոր խմբագրությամբ. «Անվանացանկի և քաղաքացիական ծառայության պաշտոնների անձնագրերի հաստատումից հետո Ծառայության քաղաքացիական ծառայողներն օրենքով սահմանված կարգով վերանշանակվում են՝ առանց մրցույթի և ժամկետային աշխատանքային պայմանագրեր կնքելու, բացառությամբ աջակցող մասնագիտական կառուցվածքային ստորաբաժանումների քաղաքացիական ծառայողների: Աջակցող մասնագիտական կառուցվածքային ստորաբաժանումների քաղաքացիական ծառայողները կարող են օրենքով սահմանված կարգով վերանշանակվել հիմնական մասնագիտական կառուցվածքային ստորաբաժանումներում` հավասարազոր կամ ավելի ցածր պաշտոններում: Պաշտոններում չնշանակված քաղաքացիական ծառայողները սահմանված կարգով գրանցվում են կադրերի ռեզերվում։»,- նշվում է նախագծում:

Հայկ Դավթյան