Ահա թե ինչու չեն հանդիպել Փաշինյանն ու Պուտինը

Այսօր Ղազախստանի մայրաքաղաք Նուր Սուլթանում կայացած ԵԱՏՄ Բարձրագույն խորհրդի նիստի շրջանակներում չի կայացել ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի նախատեսված հանդիպումը:
Նշենք, որ Փաշինյանը վերադարձել է Նուր Սուլթանից:

Ի՞նչ եք կարծում՝ ինչպե՞ս կարող է կատարվածը մեկնաբանել ռուսական կողմը... «Պարզաբանում» կոչվածը, գոնե, պետք է լինի հնարավորինս խելքին մոտ, բայց արի ու տես, որ այս դեպքում էլ են Հայաստան պետությանը «ձեռք են առնում»...
Ահա մի պաշտոնական արձագանք ռուսական կողմից:

ՌԴ Պետդումայի ԱՊՀ երկրների, եվրասիական ինտեգրման և հայրենակիցների հարցով հանձնաժողովի ղեկավար Լեոնիդ Կալաշնիկովը կարծիք է հայտնել, որ կատարվածը կարող էր պատահականության և հանգամանքների արդյունք լինել: «Դա կարող է լինել ինչ ասես, սակայն, ամենայն հավանականությամբ, ինչ-որ հանգամանքներ են եղել, քանի որ մեր նախագահը, եթե ինչ-որ բան նախատեսում է, ապա սովորաբար անում է դա: Նշանակում է, որ ինչ-որ հանգամանքներ են եղել, որոնք իսկապես թույլ չեն տվել, որ հանդիպումը կայանա: Պետք չէ դրանում դավադրական դրդապատճառներ փնտրել: Ոչ, դա, ամենայն հավանականությամբ, ստացվել է: Հատկապես, որ հոկտեմբերին նախատեսվում է Պուտինի պաշտոնական այցը Հայաստան: Չեմ կարծում, որ այստեղ կանխամտածվածություն կա», - РУСАРМИНФО-ին տված հարցազրույցում ասել է պատգամավորը: Կալաշնիկովը հավելել է, որ այդ դրվագը չի ազդի հայ-ռուսական հարաբերությունների վրա:

Հիշեցնենք նաև, որ ավելի վաղ հայտնի էր դարձել, որ Ռուսաստանի Դաշնային խորհրդի խոսնակ Վալենտինա Մատվիենկոն Հայաստանի ԱԺ նախագահ Արարատ Միրզոյանի հետ հանդիպմանը հայտնել էր, որ մայիսի 29-ին ԵԱՏՄ Բարձրագույն խորհրդի գագաթնաժողովի ժամանակ կկայանա Փաշինյանի և Պուտինի հանդիպումը:
Այսինքն, «ինչ-որ հանգամանքներ», այնուամենայնիվ, խանգարել են:

Հայաստանի Հանրապետության վարչապետ Նիկոլ Փաշինյանը կմասնակցի Սանկտ Պետերբուրգի միջազգային տնտեսական համաժողովին: Ինչպես նշում է tass.ru-ն, այս մասին հայտնել է ՌԴ նախագահի մամուլի խոսնակ Դմիտրի Պեսկովը: «Մենք սպասում ենք Հայաստանի վարչապետին»,-ասել է Պեսկովը՝ պատասխանելով լրագրողի այն հարցին, թե Չինաստանի ղեկավար Սի Ձինփինից բացի օտարերկրյա ղեկավարներից էլ ով է մասնակցելու համաժողովին:

Այս հայտարարությամբ, թերևս, ռուսական կողմը փորձել է շտկել մթնոլորտը՝ հայկական մեդիատիրույթում այսօրվանից առկա քննարկումների ֆոնին:

Հիշեցնենք, որ Սանկտ Պետերբուրգի միջազգային տնտեսական համաժողովը կկայանա հունիսի 6-8-ը: Իսկ Փաշինյանը դեռ երկու շաբաթ առաջ հայտնել էր, որ Սանկտ Պետերբուրգում կհանդիպի ՌԴ նախագահ Վլադիմիր Պուտինի հետ: Նա ռուս լրագրողներին հայտնել էր, որ մտադիր է մասնակցել Պետերբուրգի միջազգային տնտեսական ֆորումին, որտեղ կհանդիպի ՌԴ նախագահ Վլադիմիր Պուտինի հետ. «Ես մասնակցելու եմ Նուր-Սուլթանում՝ մայիսի 29-ին կայանալիք Եվրասիական բարձրագույն տնտեսական խորհրդի նիստին, այնուհետև հունիսին կմասնակցեմ Պետերբուրգի միջազգային տնտեսական ֆորումին»,- ասել էր Փաշինյանը ռուս լրագրողներին:

Մետաքսյա Շալունց