«Դայմոթեք» ադամանդագործական գործարանը ստիպված է աշխատակիցներ փնտրել

Գործազրկության այն մակարդակի պարագայում, որը կա Հայաստանում, «Դայմոթեք» ադամանդագործական գործարանը ստիպված է աշխատակիցներ փնտրել։ Այս մասին ապրիլի 12-ին լրագրողներին ասել է ձեռնարկության տնօրեն Էդգար Հովհաննիսյանը։ «Հիմա մենք պատրաստ ենք ընդունել մոտ 100 մարդու, ընդ որում, կարող ենք ինքներս նրանց սովորեցնել։ Մեր միջին աշխատավարձը 200 հազար դրամ է։ Բայց չգիտես ինչու, շատ քիչ մարդ է գալիս»,- հավելել է նա։ Հիմա գործարանը ամսական 3-7 հազար կարատ ալմաստ է վերամշակում, սակայն ամենալավ ժամանակներում՝ մինչեւ 2004-2005թթ., ծավալը հասնում էր 15 եւ ավելի հազարի։ «Իհարկե հիմա մենք ուզում ենք բարձրացնել աշխատանքի արդյունավետությունը, մշտապես մեծացնում ենք քարերի չափը։ Եթե նախկինում մենք վերցնում էինք միջինում 1 կարատ քար, ապա հիմա փորձում ենք ավելի խոշոր քարեր վերցնել»,- հավելեց Հովհաննիսյանը։