The Huffington Post. Հրադադարի ռեժիմն Ադրբեջանն է խախտել

ԼՂՀ ներկայացուցիչները պետք է խաղաղության եւ անվտանգության վրա ազդող քաղաքական բանակցությունների մասը լինեն։ Այս մասին The Huffington Post-ում լույս տեսած հոդվածում գրել են Ամերիկայի հայկական ասամբլեայի համանախագահ Վան Գրիգորյանն ու Կոլումբիայի համալսարանի մարդու իրավունքների ուսումնասիրության ինստիտուտի եւ խաղաղարարության աջակցության ծրագրի տնօրեն Դեւիդ Ֆիլիփսը։ Հոդվածը նշում է, որ ղարաբաղյան հակամարտությունը ռազմական լուծում չունի։ Պարբերականը հիշեցնում է, որ Լեռնային Ղարաբաղում ապրիլի 2-ին նորից սրվել է հակամարտությունը, որը բազմաթիվ զոհերի պատճառ է դարձել։ «Ադրբեջանը խախտել է 1994-ին հաստատված հրադադարի ռեժիմը։ Իրադրությունը ծայրահեղ անկայուն է՝ չնայած ժամանակավոր հրադադարին։ ԱՄՆ-ն եւ Ռուսաստանը պետք է ակտիվացնեն միջնորդական ջանքերը։ Ամերիկյան օրենսդրությունն արդեն Ադրբեջանի նկատմամաբ պատժամիջոցներ է նախատեսում, եթե այդ երկիրը հետագայում էլ շարունակի ագրեսիվ գործողությունների դիմել»,- նշում են հեղինակները։ Օբամայի վարչակազմը, ըստ հոդվածի, պետք է կյանքի կոչի Ազատության պաշտպանության մասին օրենքի 907-րդ հոդվածը եւ տնտեսական ու դիվանագիտական պատժամիջոցներ կիրառի Ադրբեջանի դեմ՝ որպես ագրեսիայի դիմաց պատիժ։ «1992-ին նախագահ Ջորջ Բուշ ավագը ստորագրեց այդ հոդվածը, որն արգելում է օգնել Ադրբեջանին, եթե նա Հայաստանի կամ Լեռնային Ղարաբաղի դեմ ագրեսիվ գործողություններ իրականացնի։ Օրենքի այդ մասը կարեւոր զսպող գործոն էր, որը նպաստում էր շփման գծում հրադադարին»,- հիշեցնում են հեղինակները։ «Միջազգային հանրության կողմից անտարբերությունը նպաստեց Ադրբեջանի համակարգված հարձակմանը։ Ադրբեջանը միայնակ չի գործել։ Թուրքական զորքերը եւ սարքավորումները գործի էին դրվել Իրանի հետ սահմանի մոտակայքում։ Ադրբեջանի հարձակումն անմիջապես ստացավ Թուրքիայի նախագահ Ռեջեփ Թայիփ Էրդողանի հավանությունը։ Chatham House-ը եւ Կառնեգիի հիմնադրամը պնդում են, որ Լեռնային Ղարաբաղի ուժերը չեն սադրել հարձակումը։ Հայերը 1994-ից հետեւողականորեն ընդունել են առաջարկված վստահության ամրապնդման միջոցները, Ադրբեջանը հրաժարվում էր՝ հակամարտության ռազմական լուծման կոչեր անելով»,- ասված է հոդվածում։ Ադրբեջանի նախագահ Իլհամ Ալիեւը հենվում է նավթի վաճառքից ստացվող եկամուտների եւ «խավիարային դիվանագիտության» վրա։ «Նավթի գների անկման պայմաններում Ադրբեջանի տնտեսությունը անկում է ապրում, եւ ազգային արժույթը կտրուկ նվազել է։ Քաղաքացիական հասարակությունը շարունակում է դեմ արտահայտվել լրագրողների եւ իրավապաշտպանների ազատությունների ոտնահարմանը։ Հայաստանի հետ անգամ կարճատեւ պատերազմ սկսելը Ալիեւի ռեժիմին հնարավորություն է տալիս շեղել ադրբեջանցի ժողովրդի ուշադրությունը տնտեսական անկայուն վիճակից եւ չարաշահումներից»,- գրում են հեղինակները։ Հեղինակները կարծում են, որ Ռուսաստանն ու ԱՄՆ-ն պետք է ակտիվացնեն համագործակցությունը ԵԱՀԿ ՄԽ շրջանակներում։ ԵԱՀԿ-ն պետք է դիտորդներ ուղարկի ԼՂՀ-ի եւ Ադրբեջանի շփման գիծ, որպեսզի զսպի ապագա ագրեսիան։ Հայկական կողմը պաշտպանում է դա»,- արձանագրում են հոդվածագիրները։ ԱՄՆ-ը չպետք է աննկատ թողնի Ադրբեջանի ռազմական ագրեսիան հատկապես ապրիլի 24-ին Հայոց ցեղասպանության հիշատակի նախօրեին, եզրափակում են հեղինակները։