Մանվել Գրիգորյանի ունեցվածքը

ՀՀ ԱԺ պատգամավոր, ԵԿՄ վարչության նախագահ Մանվել Գրիգորյանը Բարձրաստիճան պաշտոնատար անձանց էթիկայի հանձնաժողով է ներկայացրել իր եկամուտների եւ ունեցվածքի տարեկան հայտարարագիրը, որից պարզ է դառնում, որ գեներալը նախորդ տարի անշարժ ու շարժական գույք ոչ օտարել է, ոչ էլ ձեռք է բերել: 2015 թվականին Մանվել Գրիգորյանը 170 միլիոն դրամի փոխառություն է հանձնել, որը նույն տարում էլ նույնությամբ վերադարձվել է: ԱԺ պատգամավորը տարվա սկզբում ունեցել է 361 միլիոն 174 հազար 510 դրամ, 45 հազար դոլար եւ 45 հազար եվրո, որոնք տարվա վերջում դարձել են 348 միլիոն 440 հազար 500 դրամ, 45 հազար դոլար եւ 45 հազար եվրո: Մանվել Գրիգորյանի եկամուտները գոյացել են աշխատավարձից, շահաբաժնից եւ այլ աղբյուրներից: Նրա միայն աշխատավարձը կազմել է 6 միլիոն 851 հազար 130 դրամ, շահաբաժիններից ստացել է 83 միլիոն 249 հազար 650 եւ 65 միլիոն դրամ, իսկ այլ եկամուտները կազմել է 2 միլիոն 195 հազար 210 դրամ: Ընդհանուր առմամբ նրա տարեկան եկամուտը կազմել է 157 միլիոն 295 հազար 990 դրամ: ԵԿՄ վարչության նախագահի նախորդ տարիների հայտարարագրերից էլ տեղեկանում ենք, որ նա ունի 2 հողամաս, 1 արտադրական նշանակության շինություն եւ 2 առանձնատուն, 9 ավտոմեքենա (Ford Econoline E-150, GAZ 21R, GAZ 14 Chayka, GAZ 13 Chayka, Peugeot 405, GAZ M-20, GAZ 21U, GAZ 69, GAZ 12), 4 ընկերությունում բաժնեմաս (72 միլիոն 800 հազար, 50 հազար, 32 միլիոն 900 հազար, 61 միլիոն 540 հազար դրամներով): Նրա կինը՝ Էլյա Գրիգորյանն ունի ընդամենը 5 միլիոն դրամ: Գրիգորյանների հետ համատեղ բնակվող տղաներից Արա Գրիգորյանն էլ  2015 թվականին ստացել է 2 միլիոն 250 հազար դրամ եկամուտ: