Ուրացում.Արցախը տանում են կործանման

Լեռնային Ղարաբաղի նախագահ Բակո Սահակյանը և երկրորդ նախագահ Արկադի Ղուկասյանը դիմել են Հայաստանի գլխավոր դատախազ Արթուր Դավթյանին՝ մայիսի 9-ին ընդառաջ Ռոբերտ Քոչարյանի խափանման միջոցը փոխելու խնդրանքով:
Նամակում մասնավորապես ասված է․ «Մենք պատրաստ ենք հանդես գալ ցանկացած հրապարակային երաշխիքով, որն անհրաժեշտ կլինի նրա՝ մեկուսարանից ազատ արձակվելու և կայանալիք դատավարության ողջ ընթացքում ազատության մեջ լինելու համար»։Ղարաբաղի գործող և նախկին նախագահները դիմումում հույս են հայտնում, որ Հայաստանի գլխավոր դատախազն իր որոշմամբ հնարավորություն կընձեռի, որպեսզի Արցախի երեք ղեկավարներն էլ ներկա գտնվեն մայիսի 9-ի տոնակատարություններին Ստեփանակերտում և Շուշիում, «ինչը, վստահաբար, համերաշխության և միասնականության ազդակ կդառնա ոչ միայն մեր հասարակության, այլև ամբողջ աշխարհի ու նաև հակառակորդի համար»:

Ակնհայտ է, որ սա ոչ միայն Արցախի երկու նախագահների անձնական տեսակետ-խնդրանքն է, այլ ամբողջ ժողովրդի։

Գլխավոր դատախազությունը   արձագանքել է նախագահների դիմումին, որից դատելով կարող ենք ասել, որ գլխավոր դատախազ Արթուր Դավթյանը միջին վիճակագրական անգրագետ է, կամ էլ իր վրայից պատասխանատվությունը ցրելով` մի ոչ իրավաբանական լոլո է կարդացել։
Դատախազությունից տարածել են հետեւյալ հաղորդագրությունը ․«ՀՀ քրեական դատավարության օրենսգրքի 151-րդ հոդվածի համաձայն՝ խափանման միջոցը կարող է փոփոխվել քրեական վարույթն իրականացնող մարմնի կողմից:
ՀՀ հատուկ քննչական ծառայությունում նախաքննությունը մեղադրական եզրակացության կազմմամբ ավարտված քրեական գործը՝ ըստ մեղադրանքի նաեւ Ռոբերտ Քոչարյանի, 2019 թվականի ապրիլի 29-ին ըստ էության քննելու համար ուղարկվել է Երեւան քաղաքի ընդհանուր իրավասության դատարան:
Քանի որ տվյալ քրեական գործը ներկայումս գտնվում է Երեւան քաղաքի ընդհանուր իրավասության դատարանում, ՀՀ դատախազությունը տվյալ քրեական գործով վարույթն իրականացնող մարմինը չէ, հետեւաբար նախագահների կողմից ՀՀ գլխավոր դատախազին հասցեագրված դիմումի քննարկումը ներկա փուլում դուրս է ՀՀ դատախազության լիազորությունների տիրույթից»:

Արցախի նախագահ Բակո Սահակյանի հայաստանյան ներկայացուցիչ Գառնիկ Իսագուլյանի կարծիքով քանի դատարանը գործը վարույթ ընդունելու մասին որոշում չի կայացրել, գործը դատարանի վարույթում չէ, նշանակում է, որ դատարանը չի կարող այս պահին որոշում կայացնել խափանման միջոցի փոփոխման վերաբերյալ, հետեւաբար այն գտնվում է նախաքննության մարմնի՝ դատախազի տիրույթում.<<Դատախազը բացարձակ ստում է, որովհետեւ այն պահին, երբ գրվել է այս ուղերձը, դիմումը, խնդրանքը, գործը դատարանի վարույթում չէր, նախկին դատավորը ինքնաբացարկ էր հայտնել, եւ դժվար էր կանխատեսել, որ երկու ժամվա ընթացքում գործը կմակագրվի ինչ որ դատավորի վրա>>: Գառնիկ Իսագուլյանի խոսքով՝ առհասարակ կարեւոր չէ, թե Արցախի նախկին եւ ներկա նախագաները ում անունով են դիմումը հղել, դա ուղղված է առհասարակ Հայաստանի հանրապետությանը, իշխանություններին, ՀՀ քաղաքացիներին: Դատախազության մեկնաբանությունը նրա կարծիքով՝ ակնհայտ խուսափոխականություն է խնդիրը ոչ կառուցողական դաշտ մտցնելու ուղղությամբ.<<ՀՀ նախագահը, վարչապետը, ԱԺ նախագահը, արդարադատության նախարարը, ԱԱԾ պետը, գլխավոր դատախազը, ոստիկանապետը, բոլորը պատասխանատվություն են կրելու: Սա ոչ թե Պուտինի կամ Թրամփի խնդրանքի մերժում է, այլ Արցախի ուրացում կնշանակի, որովհետեւ այս մարդիկ ցույց են տալիս, որ ընդհանրապես թքած ունեն Արցախի՝ որպես անկախ հռչակած հանրապետության վրա, սրանով Արցախի հարցի հետագա լուծումն էլ դարձնում են շատ մութ: Այս կոչ-խնդրանքի մեջ շատ լուրջ գաղափար կար դրված, եթե սա չեն հասկանում հայաստանյան իշխանությունները, նշանակում է ոչ միայն Արցախը, այլ Հայաստանը տանում են կործանման:Օր առաջ պետք է սրանցից ազատվել>>:

Անի Սահակյան