Փաշինյանի տապալման պատասխանատվությունը չեն ուզում կիսել

Նաիրա Զոհրաբյանը հայտարարել է, որ ՀՀ Ազգային ժողովի «Բարգավաճ Հայաստան» խմբակցությունը երկրորդ ընթերցման ժամանակ ևս դեմ է քվեարկելու «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին և կից ներկայացված օրենքների նախագծերի փաթեթով ներկայացված փոփոխություններին:

«Ինչպես առաջին ընթերցման ժամանակ, երկրորդ ընթերցման ժամանակ ևս «Բարգավաճ Հայաստան» խմբակցությունը դեմ է քվեարկելու խորհրդարանին ներկայացված օրենքի այս նախագծին»,- նել է նա: Պատգամավորի խոսքով` մշակույթի նախարարությունը կրթության և գիտության, սպորտի նախարարության հետ միացնելու մեջ տրամաբանություն չի տեսնում:

«Լուսավոր Հայաստան» խմբակցությունը ևս համաձայն չէ կառավարության կառուցվածքի առաջարկվող տարբերակին: Ազգային ժողովում նախագծերի փաթեթի երկրորդ ընթերցմամբ քննարկման ընթացքում ԼՀԿ խմբակցության անդամ Անի Սամսոնյանը հայտարարել է, որ ուժային կառույցներին խորհրդարանական վերահսկողության դաշտ չբերելու կառավարության արդարացումները ձախողվել են: «Սահմանադրությունը հստակ որոշում է, թե ովքեր են խորհրդարանական վերահսկողության դաշտում: Ընդդիմության առաջարկների ընդունման ձեր նոր մշակույթը ողջունելի է, բայց այն կարծես դեռ կաղում է»,- ասաց Սամսոնյանը:

«Լուսավոր Հայաստան» խմբակցության պատգամավոր Աննա Կոստանյանը նշեց, որ դիմում-նամակ է հղել ՀՀ վարչապետ Նիկոլ Փաշինյանին՝ առաջարկելով ուշադրություն սևեռել հատկապես մշակույթի նախարարությունը որևէ այլ գերատեսչության չմիավորելու հանգամանքի վրա: «Մշակութային քաղաքականությունը պետք է մշակվի և իրականացվի մեկ կառույցի, այլ ոչ թե միավորված կառույցի կողմից»,- նշել է Կոստանյանը: Ըստ էության, Նիկոլ Փաշինյանն ու նրա թիմը մենակ են մնում կարևոր նախաձեռնություններում: Կառավարության կառուցվածքի հարցը կարևոր սկզբունքային խնդիրներից է, որի շուրջ քաղաքական կոնսենսուսը իշխանության համար կարևոր քննություն է: Ճիշտ է, իշխող ուժը խորհրդարանում սահմանադրական մեծամասնություն ունի, ինչն առավել քան բավարար է կառավարության կառուցվածքի և գործունեության մասին առաջարկվող նախագիծը, որով հիշեցնենք, նախատեսվում է մի շարք նախարարությունների միավորում, ընդունել: Քաղաքական համաձայնության առակայության դեպքում պատասխանատվությունը կիսվում է:

Եթե կառավարման նոր մոդելը ավելի անարդյունավետ լինի, քան ներկա համակարգն է, ապա դրա համար պատասխանատվության իրենց մասնաբաժինը կունենան նաև խորհրդարանի մյուս երկու ուժերը: Ու չնայած և' Լուսավոր Հայաաստանը և Բարգավաճ Հայաստանը հանդես են եկել որպես հեղափոխությանը աջակցող ուժեր, սակայն նրանք չեն պատրաստվում աջակցել Փաշինյանի նախաձեռնությանը` թերևս քաջ գիտակցելով, որ անկախ կառուցվքածքից և նախարարությունների թվից` ներկա կառավարությանը չի հաջողվելու շոշափելի արդյունքներ ցուցաբերել: Հետևաբար ինչ իմաստ ունի մտնել խորտակվող նավը:

Հայկ Դավթյան