Բակո Սահակյանը սպառնացել է «դաշնակիցներին»
«Ցանկացած քննարկում և ցանկացած որոշում չի կարող կյանքի կոչվել առանց Արցախի Հանրապետության մասնակցության»,- երեկ Ստեփանակերտում կայացած ասուլիսում հայտարարեց Լեռնային Ղարաբաղի նախագահ Բակո Սահակյանը: «Այս պահի դրությամբ համանախագահների կողմից ձեռնարկվում են տարբեր քայլեր, և ես չունեմ տեղեկություններ, թե ինչ են Բաքվում քննարկել Ռուսաստանի և Ադրբեջանի արտգործնախարարները: Բայց մի բան կարող եմ հստակ փաստել․եթե մենք չվերանայենք մեր մոտեցումը բանակցային գործընթացի նկատմամբ, մենք ունենալու ենք միշտ թերի լուծումներ»,- հայտարարեց Սահակյանը: Պատասխանելով տեղացի և օտարերկրացի լրագրողների հարցերին՝ Լեռնային Ղարաբաղի ղեկավարը նաև շեշտեց՝ եթե Ադրբեջանը կրակի դադարեցման մասին պայմանավորվածությունը չպահպանի, ապա «ստիպված կլինեն հասցնել հաջորդ անհրաժեշտ հարվածը»․- «Եթե Ադրբեջանը հերթական անգամ կխախտի այս վերջին ձեռք բերված պայմանավորվածությունը, ապա այդ դեպքում, ինչպես ամսի 1-ի, լույսի 2-ի գիշերվա զարգացումների ընթացքում, զինված ուժերը մեր մյուս ստորաբաժանումների հետ միասին, լինեն դրանք կամավորական կամ ոչ կամավորական, հասցնելու են հաջորդ անհրաժեշտ հարվածը»: Բակո Սահակյանը նաև տեղեկացրեց, որ ղարաբաղյան կողմը ունի մի շարք պահանջներ, որոնք պատրաստվում են ներկայացնել Բաքվից Լեռնային Ղարաբաղ ժամանակ Մինսկի խմբի ամերիկացի, ռուս, ֆրանսիացի համանախագահներին: «Բնականաբար, մեզ հետաքրքրում է թե ինչպիսի է նրանց տպավորությունը, ինչ հարցեր են քննարկել Ադրբեջանի ղեկավարության հետ: Քանի որ Մինսկի խմբում կա ԵԱՀԿ-ի գործող նախագահի անձնական ներկայացուցիչ, որը իրականացնում է դիտորդական առաքելություն շփման գծում, բնականաբար, մենք ունենք առաջարկություններ նաև այդ առումով»,- ասաց Ղարաբաղի նախագահը: Սահակյանը շեշտեց, որ պատրաստ են զրկանքներ կրելու՝ «վերջնական ազատություն ձեռք բերելու համար»․- «Այս երկար տարիները հնարավորություն են տվել համոզվելու, որմենք պատերազմում ենք ոչ թե պատերազմի, այլ խաղաղության համար: Այս վերջին ռազմական գործողությունները նույնպես մենք ընկալում ենք այդպես և պատրաստ ենք զոհաբերվելու, զրկանքներ կրելու, հնարավորություն ունենալու վերջնական ազատություն ձեռք բերելու»: Բակո Սահակյանը ընդգծեց, որ հրաման է տվել իրականացնել միջոցառումներ հակառակորդի գործողությունները կասեցնելու համար ու եթե Ադրբեջանը փորձի նորից խախտել հրադադարի ռեժիմը` Ղարաբաղը իրականացնելու է «հաջորդ անհրաժեշտ հակահարվածը»: Պաշտոնական Ստեփանակերտի ուղերձը մեկն է` ցանկացած առաջարկություն մինչև չիրականացվի Լեռնային Ղարաբաղի պաշտոնական մասնակցությամբ, դրանք չեն կարող լիարժեքորեն և վերջնականապես կյանքի կոչվել: Ընդ որում, հատկանշական է, որ ԼՂՀ նախագահը, փաստացի, նշել է, որ տեղյակ չեն, թե Բաքվում Լավրովն ու ադրբեջանական իշխանություններն ինչ են քննարկում: Այլ կերպ ասած, Բակո Սահակյանն արձանագրել է` առանց ԼՂՀ-ի ոչ մի համաձայնություն չի կարող կնքվել, իսկ եթե Ադրբեջանը շարունակի շփման գծում ռազմական գործողությունները` համարժեք պատասխան է ստանալու: Հայկական կողմը, այս փուլում ողջ ուժերը պետք է լարի` Ղարաբաղը բանակցությունների սեղանին վերադարձնելու ուղղությամբ: Ադրբեջանը պարտավոր է նստել բանակցությունների սեղանի շուրջ` Լեռնային Ղարաբաղի հետ: Միայն այդ կերպ հնարավոր կլինի թույլ չտալ, որպեսզի հերթական անգամ Ղարաբաղը հանձնելու ծրագիրն իրականացնեն: Ռուսաստանն այս օրերին բացահայտ առանձին խաղ է տանում, նշելով, թե` փորձում է հանդարտեցնել պայթյունավտանգ իրավիճակը: Եթե դա այդպես է, ապա հասունացել է պահը, որպեսզի Մոսկվան Ալիևին համոզի` Արցախի հետ նստել բանակցությունների սեղանի շուրջ: Եթե ոչ հիմա, ապա էլ ե՞րբ... Թամար Բագրատունի
Հետևեք մեզ Viber-ում
