Ստիպեցին կռվել ոչ թե Ղարաբաղի, այլ Ռուսաստանի դեմ. Կոմանդոս
Արցախի հերոս Արկադի Տեր-Թադևոսյանը լրագրողների հետ հանդիպման ժամանակ նշեց, որ «Սմերչ» զինատեսակը, ըստ կողմերի պայմանավորվածության, չպետք է օգտագործվեր Ղարաբաղի դեմ: Գեներալ-մայոր Արկադի Տեր-Թադևոսյանը իր խոսքում նշել է. «Գիտեք, ես շատ եմ «հավանում» Թուրքիան և Ադրբեջանը: Թուրքիայի սուտը ժամանակին պարզ դարձավ, հիմա էլ միջազգային հանրությունը սկսում է հետզհետե բացահայտել Ադրբեջանի սուտը: «Սմերչը» և այլ զինատեսակներ, որոնք Ռուսաստանից գնել էր Ադրբեջանը, ըստ պայմանավորվածության, Ադրբեջանը խոստացել էր չկիրառել Ղարաբաղի դեմ: Հիմա թող ՌԴ ՊՆ նախարար Շոյգուն և Ռուսաստանի վարչապետ Մեդվեդևը պարզաբանումներ անեն, թե ինչու այնպես ստացվեց, որ Ադրբեջանը օգտագործեց «Սմերչ»-ը: Ադրբեջանը հերթական անգամ արեց իր ստոր քայլը», – ասաց Արկադի Տեր Թադևոսյանը: «Կարծում եմ, Ադրբեջանին ձեռնտու չէ այս պատերազմը, նրանց ստիպեցին իրենց հարևան և բարեկամ երկրները: Ըստ իս, ստիպեցին կռվել ոչ թե Ղարաբաղի, այլ Ռուսաստանի դեմ: Ուկրաինայի, Աֆղանստանի դեպքերն ուղված էին Ռուսաստանի դեմ, մենք նմանատիպ խաղի մեջ ենք ներքաշված: Ի՞նչ են ուզում այդ «խաղացողները» դժվար է հասկանալ, բայց այն, որ հիմա մեծ ու բազմակողմանի խաղ է գնում, դա փաստ է: Սա իմ կարծիքն է, որի հետ համամիտ են շատերը», – նշեց գեներալը:
Հետևեք մեզ Viber-ում
