Արտակարգ դեպք Վանաձորում. ծերատանը լոգանք ընդունելիս այրվածքներ է ստացել 68-ամյա բնակիչը/տեսաշար/

 
Երեկ՝ ապրիլի 29-ին, սանավիացիայի ուղղաթիռը Վանաձորի բժշկական կենտրոնից «Էրեբունի» բժշկական կենտրոն է տեղափոխել Վանաձորի ծերատան բնակիչ՝ 68-ամյա Սամվել Ստեփանյանին:

Ինչպես հայտնում է ֆոտոլրագրող Գագիկ Շամշյանը, վերջինս հիվանդանոց է ընդունվել երեկ, կեսօրին՝ մարմնի մոտ 35 տոկոս մակերեսի ջերմային այրվածքներով:
Ֆոտոլրագրողի տեղեկություններով՝ դեպքը գրանցվել է գիշերը: Պապիկը լոգանք ընդունելիս վայր է ընկել, ձեռքով հարվածել տաք ջրի ծորակին, ինչի արդյունքում էլ ջերմային այրվածքներ է ստացել:

Վանաձորի բժշկական կենտրոնում անհրաժեշտ անհետաձգելի բժշկական միջոցառումներից հետո որոշում է կայացվել հիվանդին շտապ տեղափոխել Երևան:

SHAMSHYAN.com-ի թղթակցի հետ զրույցում վանաձորցիներն ասում էին. «Ուզում ենք մեր շնորհակալանքի խոսքն ուղղել առողջապահության նախարար Արսեն Թորոսյանին, Վանաձորի և Էրեբունի բժշկական կենտրոնների բժիշկներին, ովքեր բավականին օպերատիվորեն արձագանքեցին դեպքին։ Հատուկ շնորհակալություն ենք հայտնում ուղղաթիռի անձնակազմին, ովքեր արդեն երկրորդ անգամ Վանաձորից ուղղաթիռով հիվանդին տեղափոխում են մայրաքաղաքի հիվանդանոցներ»։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները և տեսանյութը՝ Արմինե Դանիելյանի