Վարորդի մոտ հայտնաբերվել է զենք և կաթուցիչ

Երեւան-Էջմիածին ավտոճանապարհին հարսանեկան ավտոշարասյան մասնակից՝ BMW մակնիշի 36 AT 484 համարանիշի եւ Kia Sorento մակնիշի 31 ՏM 003 համարանիշի ավտոմեքենաներից ընթացքի ժամանակ կրակոցներ են արձակվել։ Այս մասին հայտնում է Shamshyan.com-ը:

Աղբյուրի տեղեկություններով Երեւան-Էջմիածին ավտոճանապարհի Մայրաքաղաքային 5-րդ հասցեի մոտից ոստիկանության Վաղարշապատի բաժին են բերման ենթարկել նշված ավտոմեքենաներն՝ իրենց ուղեւորներով։

Ոստիկանները պարզել են, որ BMW-ն վարել է Երեւան քաղաքի բնակիչ 24-ամյա Դավիթ Մ.-ն, իսկ նրա ուղեւորը եղել է Երեւան քաղաքի բնակիչ 20-ամյա Խոսրով Ա.-ն։ Պարզվել է նաեւ, որ Kia-ն վարել է Փարաքար գյուղի բնակիչ 23-ամյա Էդգար Օ.-ն, իսկ նրա ուղեւորներն են եղել 23-ամյա Ռուդիկ Հ.-ն եւ 23-ամյա Զոհրաբ Հ.-ն։

Աղբյուրի տեղեկություններով՝ Էդգար Օ.-ի անձնական խուզարկությամբ հայտնաբերվել է 1 հատ կաթուցիչ՝ մոխրացված զանգվածով եւ նրա անվամբ զենքի հաշվառման քարտ։ Արդեն ոստիկանությունում նա հայտնել է, որ կաթուցիչը պատկանում է իրեն, որով ինքն օգտագործել է մարիխուանա տեսակի թմրամիջոց, իսկ զենքը պատկանում է իրեն ու Kia-ի մեջ է։ Պարզվել է նաեւ, որ Երեւան-Էջմիածին ճանապարհին մի քանի անգամ կրակոցներ է արձակել օդ։

Աղբյուրի տեղեկություններով նշված ավտոմեքենաները տեղափոխվել են ոստիկանության Վաղարշապատի բաժնի հատուկ պահպանվող տարածք։ Փաստի առթիվ հարուցվել է քրեական գործ։ Հարսանքավորները բաց են թողնվել։