Բռնատիրության օրոք պայքարը լինում է փողոցում

Այսօր Երեւանի Սարյանին պուրակից մի խումբ քաղաքացիները՝ ձեռքներին տարբեր չափսի տոնածառներ, երթով շարժվեցին դեպի Ազատության հրապարակ: «Մենք որոշեցինք հավաքվել, մեր համերաշխությունը հայտնել նաեւ ձերբակալված քաղաքացիներին: Մենք ունենք քաղբանտարկյանել, որոնցից մեկը նաեւ վերջերս ձերբակալվեց եւ կալանավորվեց՝ Գեւորգը Սաֆարյան: Կալանավորվեց տոնածառը պաշպանելու համար, ի դեպ: Մենք ուզում ենք ուղղակի ապացուցել, որ ՀՀ-ում քաղաքացիներն իրավունք ունեն սահմանադրական իրավունքներից բացի բռնել տոնածառ, տեղադրել տոնածառ ու նաեւ հագնել տոնածառի նման հագուստներ եւ որեւէ մեկը, ոչ մի ոստիկանություն, ոչ մի իշխանություն, ոչ մի Սերժ Սարգսյան, ոչ ոք չի կարող բռնանալ տարրական իրավունքների վրա»,- երթից առաջ հայտարարեց «Ժառանգություն» կուսակցության անդամ Հովսեփ Խուրշուդյանը՝ հավելելով, որ պետք է իշխանության վախերը չափել: Տոնական հավաքի ավարտից հետո «Նոր Հայաստան» ճակատի առաջնորդներից Ժիրայր Սեֆիլյանն անդրադառնալով  քննադատություններին առ այն, որ «Նոր Հայաստան»-ի՝ իշխանափոխության համար սկսված պայքարը վերածվել է տոնածառ դնելու համար պայքարի կամ վրան տեղադրելու արգելքի դեմ պայքարի, ասաց. «Բռնատիրության օրոք պայքարը լինում է փողոցում եւ պատահական չէ, որ մենք դեկտեմբերի մեկից դրսում ենք գտնվում: Բռնատիրության օրոք այն մարդիկ կամ այն ուժերը, որոնք մտադրված են դասական միջոցներով, այսինքն՝ ընտրությունների միջոցներով որեւէ դրական արդյունքի հասնել՝ մեղմ ասած միամիտներ են: Ես կարող եմ երկար փաստարկներ բերել թե ինչու, բերեմ մի քանիսը: Այն երկրում, որտեղ գոյություն չունի անկախ դատարան, միայն այս փաստը բավարար է, որ ընտրություններով փոփոխություն անելու մտադրությունից հրաժարվել»,- արձագանքեց Ժիրայր Սեֆիլյանը՝ նշելով, որ պատահական չի, որ իրենք ասում են՝ իշխանափոխությունը պետք է լինի այլընտրանքային լուծմամբ: