Մեդվեդեւ. Հայաստանում Ռուսաստանի ներդրումների գումարային ծավալը մոտ 4 մլրդ դոլար է

Հայաստանում Ռուսաստանի ներդրումների գումարային ծավալը մոտ 4 մլրդ դոլար է։ Այս մասին ապրիլի 7-ին Երեւանում լրագրողներին ասել է ՌԴ վարչապետ Դմիտրի Մեդվեդեւը հայ գործընկեր Հովիկ Աբրահամյանի հետ մամուլի համար արված համատեղ հայտարարության ժամանակ։ Նա նշել է, որ երկու երկրների ապրանքաշրջանառության մեջ լավ դինամիկա է նկատվում։ Այն հիմա գերազանցում է տարեկան 1 մլրդ 250մլն դոլարը։ «Ապրանքաշրջանառությունը մի փոքր նվազել է, սակայն միայն գների տատանման պատճառով, իսկ բնական արտահայտմամբ առեւտուրը չի տուժել, ինչը, երեւի թե, ամենակարեւորն է։ «Ռուսական ներդրումների ընդհանուր ծավալը նախկին չափով է մնում՝ մոտ 4 մլրդ դոլար։ Հանրապետությունում աշխատում է ռուսական կապիտալով 13000 ձեռնարկություն։ Մենք կարծում ենք, որ դա բավական դրական է, թեպետ դա իհարկե դեռ սահմանագիծը չէ»,- ասել է նա։ Հանդիպման ավարտին ստորագրվել են խաղաղ նպատակներով տիեզերական տարածքում, քաղաքաշինության, շրջակա միջավայրի պաշտպանության, բժշկական-սանիտարական եւ միջտարածաշրջանային  համագործակցության զարգացման մասին փաստաթղթեր։