Ալիևի կեղտոտ «լվացքատունը». թեժացած կրքերի ստվերը

Եվրոպայի խորհրդի Խորհրդարանական վեհաժողովը Ադրբեջանում և եվրոպական երկրներում կոռուպցիայի և փողերի լվացման մասին բանաձև է ընդունել:

«Կոռուպցիոն լվացքատուն՝ արձագանքում նոր մարտահրավերներին փողերի լվացման, կոռուպցիայի և կազմակերպված հանցավորության դեմ պայքարում» վերտառությամբ զեկույցը հեղինակել է հոլանդացի պատգամավոր Մարտ վան դե Վենը: Փաստաթղթում նշվում է, որ Եվրոպայի խորհուրդը անհանգստացած էր «ադրբեջանական լվացքատան» զեկույցով, որտեղ խոսվում է խոշոր գումարների լվացման, Ադրբեջանի ներկայացուցիչների կողմից եվրոպացի գործիչներին և պատգամավորներին կաշառելու մասին: «Դա արվել է Ադրբեջանի իշխանությունների շահերը Եվրոպայի խորհրդում առաջ մղելու նպատակով», - նաև ասվում է ԵԽԽՎ-ի կողմից նախօրեին ընդունված բանաձևում:
Զեկույցում նշվում է, որ ԵԽԽՎ-ը խորապես մտահոգված է այդ նպատակների համար Ադրբեջանից դուրս բերված շուրջ 3 միլիարդ դոլարի կապակցությամբ:

Փաստաթղթի հեղինակի համոզմամբ՝ Ադրբեջանում կոռուպցիայի պատճառներից մեկը անկախ քաղաքացիական հասարակության, լրատվամիջոցների գործունեությունը կասեցնելն է, որոնք վերահսկիչ դեր կարող են ունենալ հանցավոր գործարքների դեմ:
Այսպես, Վան դե Վենը ներկայացրեց իր հեղինակած «Լվացքատներ. նոր մարտահրավեր կազմակերպված հանցագործության, կոռուպցիայի և փողերի լվացման ոլորտում» թեմայով զեկույցը: «Վերջին երկու տարիների ընթացքում մեծամասշտաբ միջազգային փողերի լվացման սխեմաներ են բացահայտվել: Ամենամեծ ճանաչում ունեցողներն են Գլոբալ լվացքատունը, որն ունի արմատներ ՌԴ-ում և Մոլդովայում, Ադրբեջանական լվացքատունը, որը գտնվում է Ադրբեջանում»:

Ադրբեջանցի պատվիրակներն ի պատասխան իրենց ելույթներում մեղադրել են Վեհաժողովին: ԵԽԽՎ-ում ադրբեջանական պատվիրակության անդամ Ասիմ Մոլլազադեն նշել է. «Իհարկե, հեշտ է հետաքննություն անցկացնել փոքր պետություններում՝ Մոլդովայում, Ադրբեջանում, բայց հիշեցնեմ, որ նախորդ նստաշրջաններից մեկի ընթացքում ԵԽԽՎ-ի ղեկավարները թռան Սիրիա ռազմական ինքնաթիռով և հանդիպեցին Ասադին: Այսքանից հետո դեռ հետաքննություններ են ընթանում Ադրբեջանում կոռուպցիայի վերաբերյալ: Ինչո՞ւ: Ի՞նչ նպատակ եք հետապնդում այս հարցերում առաջին պլան մղել նախկին խորհրդային պետություններին և մոռանալ կայսրություններին»: Իսկ ադրբեջանցի մեկ այլ պատվիրակ՝ Ուլվիյե Աղաևան վստահեցրել է, թե Ադրբեջանում բարեփոխումներ են ընթանում, երկրում դրական տեղաշարժեր կան: Ըստ aravot.am-ի՝ նա հայտարարել է. «Ադրբեջանի անվան միտումնավոր շեշտումը և մեղադրանքները կոնկրետ շրջանակի նախաձեռնություն են, որոնք դեմ են Ադրբեջանին: Լավ կլիներ, որ նույն մարդիկ՝ լինեն լրագրողներ, թե այսպես կոչված մարդու իրավունքների պաշտպաններ խոսեին տեղահանված հարյուրավոր մարդկանց իրավունքների խախտումների մասին: Ավելի քան 20 տարի այս անձնավորություններն այդպես էլ կոնկրետ դիրքորոշում այս հարցով չհայտնեցին»:

Ի դեպ, Վեհաժողովն ի վերջո ընդունել է վերոնշյալ զեկույցը: Զեկույցում Ադրբեջանին ուղղված մի շարք պահանջներ են ներկայացված:

Մետաքսյա Շալունց