Գուլպադ ու կրծկալդ շաքարով կտրեմ

Նիկոլ Փաշինյանի այցը Նորագավիթի մաքսակետ եւ այցի ընթացքում տեղի ունեցած միջադեպը բուռն քննարկումների առիթ է դարձել:
Շատերը այդ միջադեպերից հետեւություններ են արել, որ Փաշինյանն այլեւս հասկանում է, թե ուր է գահավիժում իր վարկանիշը, քանի որ իրական գործին փոխարինում են իր կողմից բեմադրվող տեսարանները: Եւ ամեն օր նա կատարելագործում է այդ տեսարանները՝ հարկ եղած դեպքում գերազանցելով անգամ իր լիազորությունները, քանզի հիմնավոր տագնապներ ունի, որ հպարտ քաղաքացիները շուտով իր զենքով իր դեմ են պայքարելու: Ահավասիկ, մասքակետում Փաշինյանը հանկարծակի բորբոքվեց գետնին ընկած բիչոկ տեսնելով. «Մանավանդ իմ այցի օրն ինչո՞ւ է այստեղ բիչոկ գցած գետնին: 25 տարվա բիչոկ է, սա մեր երկրի իմիջի հարցն է», ասաց բիչոկի մեծ մասնագետը՝ տեղում ախտորոշելով, որ բիչոկը ոչ թե մի քանի օրվա է, այլ ճիշտ 25 տարվա:Ապա, տեսախցիկների, լրագրողների առջև ձեռքով սրբեց պատն ու էլի գուշակեց, որ այն երկար տարի չի մաքրվել:
«Սա խայտառակ կեղտոտ տարածք է: Սա վերաբերմունք է մարդկանց, մեր դրոշի ու զինանշանի նկատմամբ: Սա անթույլատրելի վերաբերմունք է: Հիմա իրենց պարգևավճարներից կպակասեցնեք ու այստեղ կբերեք կարգին վիճակի»: Սակայն ամենադրամատիկ դրվագը դեռ առջեւում էր, Փաշինյանը հասավ մաքսատան աշխատասենյակներից մեկին ու նկատողություն արեց իրեն դիմավորող աշխատակցին վարչապետին ձգված չդիմավորելու համար, այնուհետև տեսնելով անկյունում դրված դրոշը՝ սաստիկ զայրացավ.«Դիմումդ կգրես, կգնաս տուն, լսեցի՞ր: Ով աշխատել է այդ սենյակում, բոլորը հեռացվեն աշխատանքից: Դրանց կանգնելու ձևը, հագուկապը, ոնց որ քուչում լինեն: Լավ ա՝ չեն պպզել: Ի՞նչ կապ ունի, որ վարձակալած տարածք է: Որ գնում ենք վարձով տանն ապրելու, ասում ենք՝ ոչինչ, թող խոզանոց լինի՞»: Այս թատրոնից հետո իրավագետներն արձագանքեցին, որ վարչապետը չունի լիազորություն աշխատանքից ազատելու մաքսատան աշխատողին, դրա իրավունքը վերապահված է միայն ՊԵԿ նախագահին եւ այն էլ աշխատանքային օրենսգրքով սահմանված հստակ հիմքերի առկայության դեպքում կարող է հեռացնել: Համենայն դեպս սա այն դեպքը չէ, որ կարելի է միանգամից ազատվել աշխատակցից: Հատկապես որ Փաշինյանի այցից հետո այդ աշխատակիցը հայտնեց, որ գույքը, դրոշը ներառյալ ոստիկանությանն է եւ իրենք շենքի վրայից իջեցրել են, որպեսզի ոստիկանությունից գան տանեն:
Բայց այս պատմության մեջ ամենազավեշտալի դրվագը դրոծի հետ կապված վարչապետի լալահառաչ գրառումն էր.<<Հայաստանի պետական կառավարման համակարգում չի կարող աշխատել գեթ մեկ մարդ, ով Հայաստանի պետական դրոշը գցել է ոտքերի տակ:
Եթե պետք լինի տասնյակ հազարավորների ազատել աշխատանքից՝ կազատեմ: Բայց նման վերաբերմունք պետական դրոշի նկատմամբ չեմ հանդուրժի: Եւ վերջ>>: Հետաքրքիր է, երբ Նիկոլ Փաշինյանը եռագույն դրոշը խորհրդանշող գուլպաներ էր հագնում, չէր մտածո՞ւմ, որ ՀՀ դրոշն անարգում է, բառի բուն իմաստով գցում ոտատակ, էլ չենք ասում, որ դա միայն երեվացող մասն է ու հայտնի չէ, թե դրոշից կարված էլ ինչեր է կրում…Երբ անցած տասն ամիսներին Փաշինյանի հրավիրած զանգվածային միջոցառումներին, կամ քարոզարշավի ժամանակ մեր պետական խորհրդանիշը հայտնվում է մեկի փարթամ կրծքերին, մյուսի՝ գոտկատեղին, երրորդը այն գցում էր ոտատակ ու այսպես շարունակ ուր էր Նիկոլ Փաշինյանի պետական մտածողությունը:

Անի Սահակյան