«Բարի Սամարացի» ընկերության միկրոավտոբուսը բախվել է արգելապատնեշին. կան վիրավորներ

Արարատի մարզում, այսօր՝ ապրիլի 6-ին, հերթական խոշոր ավտովթարն է տեղի ունեցել. Ժամը 10։00-ի սահմաններում Երեւան-Երասխ ավտոճանապարհի 24.5 կ հատվածում դեպի Երասխ ընթանալիս, Ford Trnsit մակնիշի 41 ND 004 համարանիշի ավտոմեքենայի վարորդը դուրս է եկել ճանապարհի երթեւեկելի գոտուց, բախվել երկաթե արգելապատնեշներին, մոտ 40 մետր տապալել արգելապատնեշներն ու մասամբ հայտնվել ճանապարհի մեջտեղում։

Shamshyan.com-ի հաղորդմամբ, վթարի հետեւանքով 3 հոգի մարմնական վնասվածքներով տեղափոխվել են Արտաշատի բժշկական կենտրոն։

Երբ Ford-ը բախվել է երկաթե արգելապատնեշներին, դրանցից մեկը շպրտվել եւ բախվել է դեպի Երեւան ընթացող MAN մակնիշի 016 ZZ 33 համարանիշի ավտոմեքենային։ Բարեբախտաբար, MAN-ի վարորդը նույնպես ճիշտ է կողմնորոշվել, կարողացել է կառավարել ավտոմեքենան։

Ոստիկանությունը պարզում է վարորդների եւ վիրավորների ինքնությունը։ Աղբյուրը հայտնում է, որ Ford Transit-ը պատկանում է «Բարի Սամարացի» ընկերությանը։