Զինադադարի պայմանավորվածությունը շատ նման է ԼՂ բանակցային գործընթացին
Լեռնային Ղարաբաղի շփման գծում զինադադարի պայմանավորվածությունը ձեռք է բերվել Հայաստանի եւ Ադրբեջանի ՊՆ նախարարների մակարդակով, սակայն Արցախը եւս այդ պայմանավորվածության իրագործողներից մեկն է, հետեւաբար, նույնպես ինչ-որ ձեւով մասնակից է գործընթացին: Այս մասին, այսօր՝ ապրիլի 6-ին, Ստեփանակերտում լրագրողներին հայտնել է ԼՂՀ նախագահի մամուլի քարտուղար Դավիթ Բաբայանը: «Դա շատ նման է ԼՂ բանակցային գործընթացին: Մենք ունենք խեղաթյուրված ձեւաչափ, եթե սկզբում ունեցել ենք երեք կողմ՝ Արցախ, Ադրբեջան եւ Հայաստան, որտեղ վերջինս ներգրավված կողմ էր: Ադրբեջանի քաղաքականության «շնորհիվ» Արցախը դուրս է մնացել բանակցություններից: Այդուհանդերձ, Արցախը ինչ-որ ձեւով մասնակցում է այդ բանակցություններին, համանախագահները գալիս են այստեղ, հանդիպում ենք: Նույնը տեղի է ունեցել այս պարագայում: Եթե վերցնենք ֆորմալ, իրավաբանական մասը, այո, համաձայնությունը ձեռք է բերվել երկու երկրների նախարարների միջեւ, բայց այդ համաձայնության իրագործողներից մեկն էլ մենք ենք, եւ այդ պայմանավորվածության կողմերից մեկն ենք»,-ասել է նա:
Հետևեք մեզ Viber-ում
