Դավիթ Անանյանի ջախջախիչ հաղթարշավը․ ՊԵԿ-ի պարգևատրման ֆոնդը կրկին կավելանա

Պետական եկամուտների կոմիտեի նախագահ Դավիթ Անանյանը նախօրեին հայտարարեց, թե ՊԵԿ աշխատակիցները, չնայած հանրային դժգոհությանը, յուրաքանչյուր ամիս ստացել են և այսուհետ ևս շարունակելու են ստանալ ամենամսյա պարգևավճարներ։
Դավիթ Անանյանի այս հայտարարության հենց հաջորդ օրը կառավարության նիստի օրակարգում ընդգրկված է մի նախագիծ, որով նախատեսվում է ՊԵկ աշխատակազմի պարգևատրման ֆոնդը կրկին ավելացնել։
Առաջարկվում է Հայաստանի Հանրապետության պետական եկամուտների կոմիտեի բնականոն աշխատանքն ապահովելու նպատակով պետական եկամուտների կոմիտեի 2019 թվականի «Աջակցություն ՀՀ պետական եկամուտների կոմիտեի կողմից իրականացվող ծրագրերին» Հարկային և մաքսային ծառայություններ» միջոցառման բյուջետային ծախսերի տնտեսագիտական դասակարգման «Հարկային և մաքսային մարմինների աշխատողների պարգևատրում» հոդվածի ծախսերն ավելացնել 2 մլրդ 330 մլն դրամով, ընդ որում՝ առաջին կիսամյակում՝ 1 մլրդ 150 մլն դրամ, ինն ամսում՝ 1 մլրդ 750 մլն.դրամ։
Նախագծի հիմնավորման համաձայն՝ նման որոշման ընդունումը պայմանավորված է նրանով, որ «Հայաստանի Հանրապետության 2019 թվականի պետական բյուջեի մասին» Հայաստանի Հանրապետության օրենքով՝ պետական եկամուտների կոմիտեի 2019 թվականի պարգևատրման ֆոնդը նախատեսվել է 1 մլրդ 836 մլն դրամ, որը բավարար չէ կոմիտեի բնականոն գործունեությունն ապահովելու նպատակով հարկային և մաքսային մարմինների աշխատանքներում բարձր արդյունավետություն ցուցաբերող աշխատակիցներին նախորդ տարիներից ձևավորված պարգևատրումները տարեսկզբից մինչև տարեվերջ վճարելու համար:
«Շուրջ 27 տարի Կոմիտեի համակարգում տեղեկատվական տեխնոլոգիաների զարգացումը, ծրագրային ապահովումը, կապի և տրանսպորտային միջոցների ձեռքբերումն ու շահագործումը, նյութատեխնիկական ապահովվածությունը և վարչարարության իրականացման համար անհրաժեշտ ֆինանսավորման խնդիրները լուծվել են հիմնականում Կոմիտեի նյութական խրախուսման և համակարգի զարգացման ֆոնդի հաշվին: Անշուշտ, Կոմիտեի նյութական խրախուսման և համակարգի զարգացման ֆոնդն իր առանցքային դերն է ունեցել հարկային և մաքսային մարմինների համակարգի աշխատակիցների սոցիալական ապահովության երաշխիքների տրամադրման և նյութական մոտիվացիայի տեսանկյունից, ինչն իր հերթին հանդիսացել է Կոմիտեի համակարգում կոռուպցիոն ռիսկերի վերացմանն ուղղված հիմնական կանխարգելիչ միջոցը:
Նախագծի ընդունումը պայմանավորված է Հայաստանի Հանրապետության վարչապետի ՀՀ ՊԵԿ մասով տրված հանձնարարականի շրջանակներում Կոմիտեի կողմից իրականացվող քաղաքականության իրականացմանը, այն է՝ վարչարարության կազմակերպման, կոռուպցիոն ռիսկերի նվազեցման, կադրային քաղաքականության, պետական եկամուտների հավակնոտ ծրագրային առաջադրանքի կատարման խնդիրները»,- նշվում է հիմնավորման մեջ։
ՊԵԿ-ը հիմանվորման մեջ նշել է նաև իրավական այն դրույթը, համաձայն որի՝ պարգևատրմանն ուղղվող միջոցները չեն կարող գերազանցել տվյալ մարմնի աշխատավարձի տարեկան ֆոնդի մինչև 30 տոկոսը: «Հանրային ծառայության մասին» ՀՀ օրենքի այս դրույթը, ինչպես պնդում է ՊԵԿ-ն իր պարզաբանման մեջ չի տարածվում Կոմիտեում ժամկետային աշխատանքային պայմանագրով աշխատող անձանց վրա, դեռևս չի նշանակում, որ Ֆոնդի միջոցների հաշվին կարող են պարգևատրվել միայն վերջիններս: Այս անհասկանալի և խուճուճ բացատրությունից հետո Դավթի Անանյանի ղեկավարած կառույցը նաև տեղեկացնում է, որ պետական եկամուտների կոմիտեի հաստիքների առավելագույն թիվը սահմանել է 3269, որից՝ ՀՀ պետական բյուջեի միջոցներով պահպանվող՝ 2769 հաստիք, իսկ ՀՀ պետական եկամուտների կոմիտեի «Հարկային ծառայության մարմնի համակարգի և մաքսային ծառայության նյութական խրախուսման և համակարգի զարգացման ֆոնդ»-ի միջոցներով պահպանվող՝ 500 հաստիք: Այս բոլոր աշխատաղները, անկախ օրենքից և տարատեսակ բացատրություններից, ամեն ամիս ստանալու են պարգաևատրում՝ տարվա կտրվածքով 4 մլրդ 200 մլն դրամ։

Հայկ Դավթյան