Դիվերսիա հերոսների դեմ
Սասնա ծռեր կուսակցությունը կրկին ակտիվացել է, այս անգամ Արցախում, թիրախում են վերցրել հարցեր ու անձանց, որոնք ուղիղ կապ ունեն Արցախի անվտանգության հետ: Ամեն ինչ սկսվեց կուսակցության այն նախաձեռնությունից հետո, որի մասին հայտարարեցին շաբաթներ առաջ: Ըստ այդմ Ժիրայր Սեֆիլյանն ու իր կուսակիցները նախաձեռնում են Արցախը Հայաստանի մարզ հռչակելու գործընթաց, որի առաջին քայլը այնտեղ ապրող ՀՀ քաղաքացիների ընտրության իրավունքի վերականգնումն է լինելու: Թե որքան վտանգավոր է նման հայտարարությունը, առավել եւս նախաձեռնությունը, թերեւս կարիք չկա պարզաբանելու: Քանի որ Արցախի ժողովուրդը դեռևս 1991 թվականի հանրաքվեով որոշել է իր կարգավիճակը եւ անցած մոտ երեսուն տարիների ընթացքում աշխարհի հետ կռիվ է տալիս իր սուվերենությունը ճանաչելու հարցով: Եւ հանկարծ պարզվում է, որ Հայաստանում որոշ մարդիկ ուզում են Արցախը միացնել Հայաստանին ու այդպիսով՝ ջուրը լցնել անցյալի թափած ջանքերը: Այս վտանգները նկատի ունենալով էլ ԱԱԽ քարտուղար Վիտալի Բալասանյանն օրերս կոչ է արել, որ նման հայտարարություն անողները ոտք չդնեն Արցախ.<<Կոչ եմ անում այդ մարդկանց, ովքեր ասում են՝ Արցախի Հանրապետությունը մարզ է՝ չհատեն սահմանը։ Մենք ունենք մեկ հայրենիք, երկու հայկական հանրապետություն, ովքեր ընդունում են այս տարբերակը, մենք պատրաստ ենք բոլորին ընդունել։ Իսկ նրանք, ովքեր կփորձեն կամ փորձում են կոչեր անել, որ պետք է հեղափոխություն անեն, որ պետք է իշխանափոխություն անեն Արցախում, ես նրանց խորհուրդ կտայի ընդհանրապես ձեռնպահ մնալ, և չխառնվել Արցախի ներքաղաքական և արտաքին քաղաքական հարցերին»,- մասնավորապես ասել է նա, ի պատասխան այսօր ՍԾ անդամ Վարուժան Ավետիսյանն է հայտարարել.
<<Վիտալի Բալասանյանը Բերձորի ահաբեկչության կազմակերպիչներից է եղել, որի մասին ինքը խոստովանեց։ Արցախի Հայաստանի Հանրապետության մարզ է եւ որեւիցե մեկը չի կարող ասել՝ ով պետք է հատի եւ ով ոչ։ Հույս ունեմ, որ իր հակապետական գործողությունները որոշակի արձագանք կստանան, նա առնվազն պետք է զրկվի այդ պաշտոնից»։
Իհարկե, Ավետիսյանի այս հայտարարությունից հետո դժվար է հասկացնելը նրան, թե իրականում ով է Վիտալի Բալասանյանը եւ ինչպիսի անուրանալի ավանդ է ունեցել եւ ունի Արցախյան գոյամարտի հարցում, սակայն միայն այն փաստը, որ Վիտալի Բալասանյանի միջնորդությամբ ու նրա հեղինակությամբ էր, որ ՊՊԾ գնդի գրավումը հանգուցալուծվեց այնպես, ինչպես տեսանք ու նախեւառաջ ծռերի համար այն չդարձավ ճակատագրական , բարոյական չէ նրան ահաբեկիչ որակելը: Իրականում թավշյա իրադարձություններից հետո նկատելի է արցախյան ազատամարտի հերոսների, ռազմահրամանատարության դեմ հայտարարեծ <<դիվերսիան>>, մի ժամանակ Փաշինյանն ու իր թիմակիցներն էին, բանը հասավ նրա, որ Սասուն Միքայելյանը, որը հավակնում է նոր Հայաստանում Մանվել Գրիգորյան դառնալ, հայտարարեց, թե հեղափոխության հաղթանակն ավելի կարեւոր էր, քան արցախյան ազատամարտը: Այս հողի վրա տեղի ունեցան բարձրաստիճան զինվորականների պաշտոնանկություններ եւ հրապարակային նկատողություն: Հիմա էլ այդ վտանգավոր գիծը կարծես թե շարունակում են ահաբեկչի համբավ հանած Ծռերը, որոնք մինչդեռ թավշյա հեղափոխությունից հետո պիտի հասկանային, որ իրենց լոզունգներն ու գաղափարներն այլեւս կենսունակ չեն :
Անի Սահակյան
Հետևեք մեզ Viber-ում
