Ղումարբազության դեմ պայքար, թե փայ մտնելու միջոց

Նիկոլ Փաշինյանի աներորդին՝ «Իմ քայլը» խմբակցության պատգամավոր Հրաչ Հակոբյանը, դեռ անցած տարեվերջին մի օրենսդրական նախաձեռնությամբ էր հանդես եկել, որով առաջարկում է արգելել տոտալիզատորների, բուքմեյքերական ընկերությունների, շահումով խաղերի գովազդը ԶԼՄ-ներում։ Հակոբյանը սա բացատրում է նրանով, որ իրեն բազմաթիվ քաղաքացիներ են այս խնդրով դիմել, որ մի բան անեն՝ արգելեն բուքմեյքերական ընկերությունների գովազդները, չխրախուսեն ինչպես պատգամավորն է սիրում օգտագործել՝ <<ղումարբազությունը>>։ Քանզի պատգամավորի համոզմամբ գովազդը նպաստում է խաղամոլությանը, եթե հնարավորինս քիչ պրոպագանդվի՝ քիչ կխաղան, եւ արդյունքում խաղամոլությունը կվերանա։

Դեռ հարց է, թե չգովազդելու դեպքում արդյոք կվերանա այս ընկերությունների պահանջարկը ու մարդիկ հետ կկանգնեն խաղամոլության սովորությունից, պատգամավորն այս մասին ուսումնասիրություն եւ հիմնավորում չունի:

Սակայն այս նախաձեռնության տողատակերն ավելի խորը կարող են լինել, քան երեւում է առաջին հայացքից: Նախ ենթադրվում էր, որ այս կարգի ընկերությունները պետք է բունտ բարձրացնեին, ի վերջո, խոսքն իրենց գոյությանն է վերաբերում, ի վերջո, սա բիզնես է եւ որեւէ մեկին պարտադրաբար չեն ստիպում օգտվել իրենց ծառայություններից, սակայն ինչպես տեսնում ենք ամիսներ է նախագիծը գոյություն ունի, բայց ձայն բարբառո հանապատի:Սա կասկածների տեղիք է տալիս, որ ինչ որ որ բան այն չէ: Ըստ էության չի բացառվում, որ նախագծի հեղինակները՝ Հրաչյա Հակոբյանի գլխավորությամբ գործարքի են գնացել խոշոր խաղացողների հետ՝ նրանց գովազդի համար հատկացվող այդ ահռելի գումարներից ազատելու համար: Ի վերջո, թե Տոտո-ն, թե Վիվառոն, թե առհասարակ որեւէ գործող կամպանիա լավ գիտե, որ խաղամոլությունն այնպիսի հետաքրքրություն է, որը գովազդով չէ, որ պետք է առաջանա: Հիմա օրենքով կարգելվի գովազդը, այդ ընկերությունները ստիպված չեն լինի մրցակցության մեջ մտնել միմյանց հետ՝ արդյունքում մեծ փողեր վատնել, դրա փոխարեն որոշակի <<փայ>> կտան իրենց լավություն անողներին: Իսկ ամենակարեւորը, որ այսպիսով մի գնդակով երկու նապաստակ կոչնչացնեն: Արգելելով գովազդը ԶԼՄ-ներում կբարդացնեն լրատվամիջոցների ֆինանսական վիճակը, ինչին այս իշխանությունը ձգտում է առաջին իսկ օրից:

Ակնհայտ է, որ նմանատիպ ծառայությունների գովազդն արգելելով՝ խաղամոլությանը վերջ չես տա, բայց այդ գովազդից սնվող լրատվամիջոցներին եւ պետական բյուջեին մեծ վնաս կհասցնես։

Անի Սահակյան