Նիկոլ Փաշինյանի չպլանավորած հարսանիքը

«2018 թվականին Հայաստանում վարչապետի 5 ընտրություն է տեղի ունեցել, 3 վարչապետ է փոխվել, տեղի է ունեցել խորհրդարանական արտահերթ ընտրություն, Երևանի ավագանու ընտրություններ, ընդհանրապես տեղի է ունեցել հեղափոխություն: Այդ հեղափոխությունից հետո, ի հեճուկս շատերի, կառավարությանը հաջողվել է պահել կայունությունը, խուսափել տնտեսական ռեցեսիոն գործընթացներից, ապահովել տնտեսական աճ, ապահովել 3-րդ հանրապետության պատմության ամենաազատ ու թափանցիկ ընտրությունները: Այդ ընթացքում եղել է գյուղատնտեսության անկումը, ինչը կապված է եղել վնասատուների, սխալ պլանավորման հետ, ստվերային այգիների գոյության հետ, որը մենք բացահայտել ենք»,- ԱԺ-ում հայտարարեց ՀՀ վարչապետ Նիկոլ Փաշինյանը՝ ի պատասխան «Լուսավոր Հայաստան» խմբակցության պատգամավոր Արկադի Խաչատրյանի հարցադրման, թե զեկույցում որևէ անդրադարձ չկա գյուղատնտեսությունը զարգացնող տեխնոլոգիաների կիրառման մասին: 

«Կներեք, բայց նույնիսկ հարսանիքի պլանավորման համար տասն ամիսը երբեմն քիչ է լինում։ Սա գիտեմ նրանից, որ հիմա հրավիրատոմսեր եմ ստանում հարսանիքի մասնակցելու, որոնք նախատեսված են տարվա վերջում, մյուս տարվա սկզբին։ Գյուղատնտեսության հետ կապված մեր ներկայացրած գործողությունների շրջանակը չէի ասի, որ համապարփակ է, բայց տրամաբանություն ունի այդպիսին դառնալու»,- ասել է Փաշինյանը և խոստովանել, որ գյուղատնտեսության ոլորտում 7,6 տոկոս անկում է գրանցվել:
Փաստորեն Փաշինյանի չպլանավորված հարսանիքը՝ անցյալ տարվա հեղափոխությունը, ունեցել է բացասական հետևանքներ, և դա կոնկրետ արտացոլված է գյուղատնտեսության ոլորտում 7,6 տոկոս անկման տեսքով։ Հարսանիքն ավարտվեց, հետհարսանեկան արարողությունները՝ նույնպես․ ընտրություններում հեղափոխական թիմն ստացավ բարձր քվե, և այսօր, բացառությամբ Հայաստանի երրորդ հանրապետության գերագույն խորհրդի առաջին ընտրությունների, ունենք ավելի քան լեգիտիմ իշխանություն։
Բայց իշխանության քաղաքական խնդիրը ընտրություններում հաղթանակ ապահովելով չի կարող սահմանափակվել, պետք է լինի տնտեսության զարգացման հստակ տեսլական, կոնկրետ ծրագրեր, ներդրումներ և աշխատատեղեր, որոնք ապահովեն թռիչք։ Քաղաքական մեղրամիսը մոտենում է ավարտին, և դրանից հետո արդեն գալու է ծրագրեր ներկայացնելու ժամանակը։ Առանց տնտեսական հզոր ծրագրի՝ իշխանության քաղաքական ամուսնությունը մեղրամսից հետո կավարտվի՝ անպտուղ ու անժառանգ։

Հայկ Դավթյան