Փաշինյանը պինդ կպահի՞ Սերժ Սարգսյանի «հագուստը»

Արդեն Ազգային ժողով է ուղարկվել կառավարության կառուցվածքային փոփոխությունների մասին նախագիծը, որը վերջին ամիսներին բուռն քննարկումների առիթ դարձավ։ Նախագծի համաձայն 17 նախարարությունների փոխարեն կունենանք 12-ը, որոշները կլուծարվեն, մյուսները կմիավորմեն, կվերակազմավորվեն եւ այլն։ Իշխանությունները հիմնավորում են, որ պետք է գնալ պետական ռեսուրսների խնայողության, օպտիմալացման ճանապարհով, սակայն պարզվում է ընդամենը մի քանի տասնյակ աշխատող է կրճատվելու։ Կառավարության ներկայացրած նախագծում այլ փոփոխություններ չեն նախատեսվում, մասնավորապես նախկինում Փաշինյանն ու իր թիմակիցները քննադատում էին սուպերվարչապետական համակարգը եւ հայտարարում, որ Սահմանադրությունն ու դրանից բխող բոլոր օրենքները մի կոստյում է, որ կարվել է «Սերժ Սարգսյանի հագով»։
Ուշագրավ է, որ կառավարության նախագծին զուգահեռ նախագիծ են մշակել նաեւ Լուսավոր Հայաստան կուսակցությունում․
«Մենք առաջարկում ենք կառավարության այնպիսի կառուցվածք, որտեղ կառավարությանը և վարչապետին ենթակա մարմիններ չլինեն, բոլորը լինեն կառավարության կառուցվածքի մեջ, այսինքն` չլինի սուպերվարչապետական համակարգ»,-այս մասին Աժ-ում ասուլիսի ընթացքում հայտարարեց ԼՀԿ խմբակցության ղեկավար Էդմոն Մարուքյանը` ներկայացնելով կառավարման իրենց նախագիծը, որով, ըստ նրանց՝ կթոթափվի սուպերվարչապետական համակարգը: Էդմոն Մարուքյանը նշեց, որ իրենց նախագծով պետք է լինի 14 նախարարություն, մասնավորապես գյուղատնտեսության եւ մշակույթի նախարարությունները պետք է առանձին գոյություն ունենան։: Նախագծով ԼՀԿ-ն առաջարկում է ԱԱԾ-ին և ոստիկանությանը տալ նախարարությունների կարգավիճակ:
Ոստիկանությունը միանա ԱԻՆ-ին՝ դառնալով Ներքին գործերի նախարարություն: Մշակույթի նախարարությունը չպետք է միանա ԿԳՆ-ին, այլ պետք է պահպանվի և կատարի ԱԳՆ-ին հավասար աշխատանք, և դա ոչ թե 3 միլիոն հայերի հետ, այլ աշխարհասփյուռ 12 միլիոն հայերի:
Գյուղնախարարությունը ևս պետք է պահպանվի, քանի որ Հայաստանը, լինելով գյուղատնտեսական երկիր, չի կարող գյուղնախարարություն չունենալ: Ըստ ԼՀԿ-ականների՝ Սփյուռքի նախարարության փակվելու մասին լուրերին խիստ բացասաբար են արձագանքում սփյուռքում, ճիշտ կլինի՝ փոխարենը մշակել սփյուռքի հետ պատշաճ աշխատելու մեթոդ:
ԱԱԾ-ն և ոստիկանությունը, այժմ համարվելով ապաքաղաքական կառույց` ստանալով նախարարությունների կարգավիճակ, չեն քաղաքականացվի՞ հարցին, Էդմոն Մարուքյանը պատասխանեց. «Ցանկացած անկախ մարմին չի քաղաքականացվի, եթե այն լինի պատշաճ քաղաքական, խորհրդարանական և քաղաքացիական վերահսկողության տակ: Այդ կառույցների քաղաքականացման վտանգն այսօր է, այլ ոչ մեր առաջարկած տարբերակով»,-ընդգծեց Մարուքյանը:
Ի դեպ, նա հայտարարեց, որ ուժայինների մասին իկրենց առաջարկը դեռեւս քննարկվել եւ հավանության է արժանացել Ելք խմբակցությունում, երբ Փաշինյանը խմբակցության ղեկավար էր, նա անձամբ ստորագրել է առաջարկների ձեւաթուղթը, որը ընդդիմադիր խմբակցությունը ներկայացրել է քննարկումների ժամանակ։ Սակայն Մարուքյանը չի կարող հայտնել՝ հիմա վարչապետի համար այդ մոտեցումները ընդունելի են, թե ոչ։ Մարուքյանը ողջ ասուլիսի ընթացքում կարմիր գծի պես տարավ այն ակնարկները, որ Փաշինյանը պարզապես պարտավոր է հրաժարվել Սերժ Սարգսյանի հագով կարված կոստյումից, մինչդեռ պարզ է, որ վերջինս չի գնա այդ քայլին եւ այս հարցից էլ «կռուտիտի» տարբերակ կմտածի, ինչպես շատուշատ հարցերի դեպքում, երբ ընդդիմադիր կարգավիճակում մեկ բան էր մտածում, իշխանության եկավ՝ բոլորովին հակառակ կարծիք ունեցավ։

Անի Սահակյան