Որտեղ է թաքնված շան գլուխը

ԱԺ-ում դիպլոմային եւ կուրսային աշխատանքների վաճառքի գովազդն արգելող օրինագծի քննարկման ժամանակ «Լուսավոր Հայաստան» խմբակցության պատգամավոր Անի Սամսոնյանը նշեց, որ իր համար այնուամենայնիվ երկու խնդիր անհասկանալի է մնում։

«Օրենքի նախագծում նշվում է արգելել գովազդի այն տեսակները, որոնք գտնվում են իրավասու մարմինների վերահսկողության տակ, բայց պետք է հասկանալ, որ այս գործունեությունը կարող է օգտագործել գովազդային այլ միջոցներ եւս, որոնք անտեսանելի են: Ինչպե՞ս է վերահսկվելու գործընթացը, քանի որ հնարավոր է, օրինակ, թռուցիկներ բաժանվեն: Կամ կազմակերպությունների գործունեությունն արգելեցինք, անհատներին ինչպե՞ս ենք վերահսկելու»,- հարցրեց նա:

Սամսոնյանը նկատեց, որ շան գլուխը թաղված է հենց բուհերի դաշտում:

«Բարգավաճ Հայաստան» խմբակցության պատգամավոր Սերգեյ Բագրատյանն էլ հարցրեց, թե համացանցում ինչպե՞ս են պայքարելու, որպեսզի գումարով կուրսային եւ դիպլոմային աշխատանքներ գրողները գովազդներ չտարածեն։ Որին ի պատասխան Հովհաննես Հովհանիսյանն ասաց,  որ  համացանցի դեպքում պայքարը հողմաղացների դեմ պայքար է, եւ այսօր դեռեւս չի գտնվել այն մեթոդը, որով հնարավոր կլինի պայքարել։