Սիրիայում վիրավորված հայ սակրավորը բուժումը շարունակում է Մոսկվայում. նա կրկնակի վիրահատության է ենթարկվել

Մարտի 7-ին Սիրիայում ականային պատահարի հետևանքով ոտնաթաթի վնասվածք ստացած հայ սակրավորը, որը մարտի 14-ի երեկոյան ռուսական ինքնաթիռով սիրիական հոսպիտալից տեղափոխվել էր Մոսկվայի Բուրդենկոյի անվան զինվորական գլխավոր կլինիկական հոսպիտալ, դեռևս շարունակում է մնալ այնտեղ։ Հայաստան տեղափոխման ժամկետները դեռևս չեն հստակեցվում, Aysor.am-ի հետ զրույցում ասաց «Հումանիտար ականազերծման և փորձագիտական կենտրոնի» հասարակայնության հետ կապերի գծով մասնագետ Նազելի Էլբակյանը: Նա նշեց, որ հայ մասնագետը կրկնակի վիրահատության է ենթարկվել, այժմ գտնվում է ապաքինման փուլում։ Այլ սակրավոր վերջինիս փոխարեն Սիրիա չի գործուղվել։ Հիշեցնենք, որ մարտի 7-ին տեղի ունեցած պատահարի պատճառ է հանդիսացել պլաստիկե իրանով ծուղակ ականը: Վիրավորված ականազերծողը նույն օրը շտապ տեղափոխվել է սիրիական հոսպիտալ և վիրահատության ենթարկվել: