Էրեբունու թաղապետարանի կեսն օտարվել է, իսկ մասնավորն այդ տարածքները վարձակալությամբ է տրամադրում «Փարոսին» և հարկային մարմնին

Էրեբունի վարչական շրջանի թաղապետարանի կեսն այս պահի դրությամբ համայնքին չի պատկանում: Մի հատվածում այս պահին վարչական մասն է, մյուս` օտարված հատվածում գործում են «Փարոսը» և հարկային մարմինը: Այս մասին Tert.am-ի հետ զրույցում ասաց Էրեբունի վարչական շրջանի լրատվության պատասխանատու Արթուր Հովսեփյանը: «2007 թ.-ին օտարվել է վարչական շրջանի մի զգալի հատվածը, բայց թե որքան քառակուսու մասին է խոսքը, մենք չունենք այդ տեղեկատվությունը: Այն ժամանակ համայնքային ավագանին որոշել է մի հատվածն օտարել: Այս պահի դրությամբ օտարված հատվածները վարձակալությամբ տրվել են հարկայինին, «Փարոսին», և դրա դիմաց մասնավոր տարեկան վճար է գանձում»,- նշեց Արթուր Հովսեփյանը: Հիշեցնենք, որ Երևանի ավագանու մարտի 19-ի նիստից հետո լրագրողների հետ զրույցում քաղաքապետ Հայկ Մարությանը հայտարարել էր, որ Դավթաշեն և Էրեբունի վարչական շրջանների թաղապետարանների շենքերի կեսը հիմա համայնքին չի պատկանում: «Այգում 2000-3000 քմ հող են վաճառել, Դավթաշեն և Էրեբունի վարչական շրջանների թաղապետարանների կեսը պատկանում է ինչ-որ այլ մարդու, ոչ թե համայնքին, կա մարզադաշտ, գրադարան, որոնք համայնքինն էին, հիմա այլ մարդու են պատկանում: Բոլոր այս նշված գործերը դատախազություն ենք հանձնել»,- հայտնել էր քաղաքապետը: Վերոնշյալ գրադարանները և մարզադաշտը ևս Էրեբունու տարածքում են: Արթուր Հովսեփյանի տեղեկացմամբ՝ թիվ 3 և 10 գրադարանների տարածքը կրկին ավագանու որոշմամբ օտարվել է 2009 թ.-ին Ինչ վերաբերում է դրանց սեփականատերերին, Էրեբունի վարչական շրջանի լրատվության պատասխանատուն նշեց. «10 գրադարանի դիմաց գրված է, որ Վազգեն Վարդանյանն է սեփականատերը, որը մեզ ոչինչ չի ասում, կամ 3 գրադարանինը՝ Հենրի Միքայելյան: Այսպիսի անուններ են, որոնք որևէ բան չեն ասում»: Համար 1 մարզադպրոցի հետ կապված՝ նոր համայնքային իշխանությունների մոտ արխիվային տեղեկանք չկա. «Մենք միայն Կադաստրում տեսնում ենք, որ գործարք է եղել 2012 թ.-ին, վաճառել են, բայց թե ինչ սկզբունքով են օտարել, ով է օտարել, չունենք տեղեկատվություն: Դրա համար քաղաքապետարանը հիմա այդ ամբողջ փաթեթը պատրաստում է, որպեսզի ուղարկի Քննչական կոմիտե: Ուսումնասիրեն, հասկանան՝ իրական տերերն ովքեր են, և, ի վերջո, այդ հաստատությունների ճակատագիրն ինչ է լինելու»,- ասաց Արթուր Հովսեփյանը: Վերոնշյալ 3 հաստատություններն էլ օտարվելուց հետո և մինչև այժմ որպես գրադարան և մարզադպրոց են գործում: Սակայն, Արթուր Հովսեփյանի խոսքով՝ խնդիրը նա է, որ համայնքը չի կարող տիրապետել այդ տարածքին, օրինակ, վերանորոգում կամ ներդրումներ իրականացնել: Հարցին, թե ինչ է ասվում օտարման որոշման հիմնավորումներում, եթե գրադարանը և մարզադաշտը պետք է շարունակեին նույն գործունեությունն իրականացնել, Արթուր Հովսեփյանը պատասխանեց. «Հիմա են թողել, բայց կարող է՝ մեկ տարի անց այդ տարածում այլ բան շահագործեին: Իսկ հիմնավորումն ավագանու որոշման մեջ հստակ է՝ չենք կարողանում պահել այդ տարածքները, ֆինանսական հնարավորություն չունենք, որպեսզի պահենք: Դրա համար օտարել են, որ մասնավորը դրան տիրապետի»: Հիշեցնենք, որ 2007 թվականին Էրեբունի վարչական շրջանի ղեկավար է եղել ՀՀԿ անդամ Մհեր Սեդրակյանը: