168 ժամը գրում է.Կառավարության տեղեկատվական բլոկի պատասխանատուն օրերս ժողով է հրավիրել իր մոտ՝ նախարարների համար հաշվետվողականության նոր սկզբունքներ սահմանելու նպատակով:
Նշենք, որ կառավարությունում` նախարարների մամուլի խոսնակներին, առընթեր մարմինների ղեկավարների խոսնակներին ժողովի հրավիրելը նոր բան չէ, եղել է նաև նախկին իշխանության օրոք, բայց գրեթե բոլոր դեպքերում դրա իմաստը եղել է այն, որ հավաքը ծառայի նախարարությունների փոխհամաձայնեցված աշխատանքին: Վարչապետի խոսնակները, որպես կանոն, նման հանդիպումներ անցկացնում էին սպասվող օրենսդրական խիստ կարևոր նախաձեռնությունների դեպքերում, որպեսզի գործընկերներին հուշեին, ուղղորդեին, թե ինչ տեսանկյունով ու ինչ մեսիջներով պետք է կառավարության ամբողջ կորպուսն իր աշխատանքների լուսաբանումն ապահովի:
Ու սա բնական է լրատվադաշտում, պետական համակարգի գործունեությունը լուսաբանելու մոտեցումներ մշակվում են ամեն նոր ղեկավարի նշանակումով պայմանավորված:
Ի դեպ, Հովհաննես Մովսիսյանը, չնայած ոլորտում ունեցած համեստ կենսափորձին, այս պաշտոնին նշանակվեց հեղափոխության արդյունքում: «Ազատություն» ռադիոկայանի նախկին լրագրող Հ. Մովսիսյանը հետևում էր Նիկոլ Փաշինյանի և նրա համախոհների քայլարշավին, հընթացս ապահովում էր նրանց լուսաբանումը ռադիոկայանի եթերում:
Հ. Մովսիսյանը մեղմորեն իր դժգոհությունն է արտահայտել խոսնակների աշխատանքի վերաբերյալ, ու որպեսզի բացատրի, թե ինչ ակնկալիքներ ունի նրանցից՝ նախ պահանջել է, որ նախարարների գործունեությունը լուսաբանող նյութերի տարափ ապահովեն կայքերում, և ապա հետաքրքիր մի դիտարկում է արել՝ նմանվեք Արտաքին գործերի նախարարի խոսնակին:
Խոսքն ԱԳՆ Աննա Նաղդալյանի մասին է, ով իրականում շատերի կարծիքով է իր գործում պրոֆեսիոնալ: Սակայն այդ արտահայտությունն անհարմար դրության մեջ է դրել գործընկերներին: Վիրավորված են, ասում են՝ հին սովորույթի ոճով՝ դպրոցի տնօրենի պես, մեզ կոչ է անում՝ «նմանվեք գերազանցիկ աշակերտուհուն»:
Խոսնակների առաջին ռեակցիան այս կոչին տարբեր է եղել, զարմացած են, որ այդքան ոչ նրբանկատ լինելով՝ Հովհաննես Մովսիսյանը բարձր որակների ու չափանիշերի մասին գնահատումները բառերով դժվարացել է ձևակերպած արտահայտել:
Մխիթարվում են նրանով, որ դարձյալ փորձի պակասից է գալիս: Բայց կառավարման գործում թույլ ունակությունները հաճախ փորձառությամբ են կոմպենսացվում:
Ի դեպ, այս հանդիպումից հետո որոշ խոսնակներ դեռևս դժվարանում են կառավարությունից ստացած հանձնարարականը փոխանցել իրենց նախարարներին: Հովհաննես Մովսիսյանը, թերևս, տեղյակ չէ, որ հեղափոխական որոշ նախարարներ տոտալ մերժում են իրենց խոսնակների հետ համագործակցությունը և խոսնակի պրակտիկան ընդհանուր առմամբ:
Փոխարենը՝ երիտասարդ նախարարները նախընտրում են մեկուսանալ իրենց աշխատասենյակներում, և, երբ սիրտները տա՝ միացնում են իրենց բջջային հեռախոսները, դիրքավորվում ու Ֆեյսբուքի միջոցով լայվով ինքնուրույնաբար տեղեկատվություն տարածում, ճիշտ այնպես, ինչպես իրենց առաջնորդն է անում ամիսը մի քանի անգամ։
Հետևեք մեզ Viber-ում
