Փաշինյանը՝ կառավարման նախագահական համակարգի մասին
Վարչապետ Նիկոլ Փաշինյանը կառավարման նախագահական համակարգին վերադառնալու անհրաժեշտություն չի տեսնում: Այս մասին նա ասաց մարտի 19-ին մամուլի ասուլիսի ժամանակ: Նրա խոսքով՝ որոշակի քննարկումներ են ընթանում նախընտրական ծրագրում ներկայացվածի շրջանակում: Առաջին հերթին խոսքը պետական կառավարման մեջ սփյուռքի մասնակցության մասին է: «Այն շրջանակը, որի մասին խոսվել է մեր նախընտրական ծրագրում, դրա վերաբերյալ, այո, որոշակի քննարկումներ կան: Խոսքը, մասնավորապես, մեր Սահմանադրության մեջ սփյուռքի ներկայացուցիչներին պետական կառավարման համակարգում ներգրավելու գործում առկա շատ խիստ սահմանափակումների մասին է, և մենք կարծում ենք, որ այդ սահմանափակումները, մանավանդ այսօր, մեր համազգային օրակարգի համատեքստում պատեհ չեն: Ուստի այդ ուղղությամբ որոշ աշխատանքներ կանենք»,- ասաց Փաշինյանը: Նա անդրադարձավ վերջին շրջանում հնչող քննարկումներին՝ երկրում խորհրդարանական կառավարման կարգը նախագահականով փոխարինելու վերաբերյալ՝ ասելով. «Ես այն կարծիքին չեմ, որ մենք հիմա նման անհրաժեշտության առաջ ենք կանգնած, քանի որ ընդամենը մեկ տարի էլ չկա, որ խորհրդարանական համակարգը գործում է: Պետք է հասկանանք, թե ի վերջո ինչ է իրենից ներկայացնում այս համակարգը և նոր միայն հետևություններ անենք: Սահմանադրությունը կենդանի օրգանիզմ է, կարող է փոխվել, բայց հիմա չէի ուզենա որևէ կանխորոշող հայտարարություն անել: Սակայն իմ անձնական կարծիքն այն է, որ մենք կառավարման համակարգը փոխելու անհրաժեշտություն չունենք, քանի դեռ չունենք հստակ փաստարկներ, թե ինչու է դա անհրաժեշտ»:
Հետևեք մեզ Viber-ում
