«Էականը ոչ թե տանկն է, այլ այն խնդիրը, որն ուզում ենք լուծել». վարչապետը զինանոցը համալրելու մասին

Ադրբեջանի զինանոցի համալրումները հաշվի առնելով` ի՞նչ է անում Հայաստանը՝ սպառազինման հավասարակշռությունը պահպանելու համար հարցին պատասխանելով վարչապետ Փաշինյանը նշեց, որ սա միայն ռազմարդյունաբերության ոլորտի խնդիր չէ, սա սպառազինության ձեռք բերման գործընթացի հետ է կապված: Այնուհետև տեղեկացրեց, որ կառուցվածքային  և բովանդակային փոփոխություններ են անում ռազմարդյունաբերության ոլորտում. «Ես համոզված եմ, որ այս ոլորտում մենք կունենանք էական ձեռքբերումներ: Ըստ էության, այսօր ունենք նոր արտադրանքներ, որոնք, հույս ունեմ, առաջիկայում սերիական արտադրության ռելսերի վրա կդրվեն: Ունենք նախագծեր, որոնք քննարկման եզրափակիչ փուլում են, ունենք նախագծեր, որոնք քննարկման  փուլում են, ունենք նախագծեր, որոնք գաղափարների փուլում են: Ես համոզված եմ, որ Հայաստանը տեխնոլոգիապես զարգացած երկիր պիտի լինի, մենք գնում ենք այդ ճանապարհով: Մի անգամ այս միտքն ասել եմ՝ մենք պետք է կենտրոնանանք ոչ թե տանկ ունենալ-չունենալու վրա, այսինքն՝ տանկ առարկայի, այլ պետք է կենտրոնանանք խնդրի վրա, որը պատկերացնում ենք, որ պիտի լուծենք տանկ ունենալու միջոցով, այսինքն՝ ո՞րն է այն նոր տեխնոլոգիան, որ մեզ պետք է թույլ տա այդ խնդիրը լուծել: Ուզում եմ ասել, որ էականը ոչ թե տանկն է, այլ այն խնդիրը, որն ուզում ենք լուծել»: