Վիտյայից լավ տղա կերտելու ճանապարհին

Օպերային կից սրճարանների ապամոնտաժման գործընթացը արդեն հանդարտվել է, այն, ինչ տեսանք այս օրերին, իսկապես, շատ հուզիչ էր ու որոշակի հետեւությունների տեղիք է տալիս։ Այսպիսով՝ ինչ կանխավարկածից ելնելով , ի վերջո, որոշեցին քանդել Օպերայի մատույցներում գտնվող սրճարանները։ Գաղտնիք չէ, որ այդ սրճարանները ոչ թե պատահական մարդկանց են պատկանում, այլ նախկին ու ներկա իշխանությունների հովանու ներքո գտնվող հայտնի օլիգարխներին։ Դեռեւս հարց է՝ արդյոք այդ սրճարանները փոխարինվելու են կանաչ տարածքներով, թե խնդիրը նախեւառաջ դրանք քանդելն է, քանի որ դա է պահանջում հեղափոխության նպատակահարմարությունը, որից առանձին անհատներ փորձում են նաեւ իրենց փիառն անել։ Խոսքն այս դեպքում, անշուշտ, Կենտրոնի թաղապետ Վիկտոր Մնացականյանի մասին է, որը առաջին օրից հայտնվել է դեպքերի կիզակետում ու իր վրա վերցրել բոլոր հարվածները, ասես դրանով կարող է մոռացության մատնել, որ ինքը ոչ վաղ անցյալում հլու-հնազանդ ծառայել է նախորդ ռեժիմին ու այն ժամանակ դեմ եղել ներկաներին, բայց իշխանափոխությունից հետո ճամբարափոխ է եղել ու հիմա էնտուզիազմով հեղափոխական է և նախկինների դեմ պայքարող է աշխատում: Ահավասիկ, ողջ համացանցը լծվել է Վիտյայից լավ տղա կերտելու գործին, շատերն են ողջունում նրա կամքը, համբերությունը, որ կարողացավ դիմանալ իր հասցեին ուղղված այդչափ անարգանքին, բայց չընկրկեց կարեւորագույն գործից, ինչպիսին սրճարաններ քանդելն էր։ Վիտյայի հերոսական կերպարն էլ ավելի թմբկահարվեց, երբ քանդող տեխնիկայի բիրտ հարվածի տակ առաջինը հայտնվեց մորաքրոջ որդու «Քոմեդի քլաբի» հիմնադիր Արթուր Ջանիբեկյանի սրճարանը՝ «Ջազվեն»։ Իշխանական հանդիսատեսն էլ ավելի ուժգին ծափահարեց, թե տեսեք-տեսեք, նոր Հայաստանում չեն գործում ծանոթ-բարեկամական կապերը ու առաջինը քանդում են եղբոր օբյեկտը։ Ու մինչ շարքային քաղաքացին իշխանության դեմ Օպերայում ճակատամարտ էր տալիս, իշխանությունից այլընտրանք պահանջելով իր հանապազօրյա հացը վաստակելու միջոց դարձած աշխատատեղը փակելու դիմաց, Ջազվեի տնօրինությունը կոտրեց պայքարի ոգին՝ տարածելով մի հայտարարություն,որով կոչ արեցին բոլոր գործընկեր սրճարանների սեփականատերերին և աշխատակիցներին դադարեցնել բողոքի ակցիաները և պայքարը տեղափոխել բացառապես իրավական հարթություն։ Սակայն ուշագրավն այն է, որ սրճարանի տնօրինությունը այդ կոչն արեց՝ ընդունելով փաստը, որ իշխանությունները չցանկացան երկխոսել իրենց հետ « ու որոշեցին շփվել ուժի լեզվով» ։«Ինչևէ, այսօրվա քաղաքային իշխանությունները հայտարարում են, որ ստանձնել են պատասխանատվություն քաղաքի բարեկարգման համար, ու մենք մաղթում ենք իրենց սկսած գործում հաջողություն։ Ժամանակը ցույց կտա, թե որքանով էին նրանց այս քայլերն արդարացված ու որքանով էին նրանց առաջ բերած մոտիվներն ազնիվ» ասցած է ընկերության հայտարարության մեջ։ Այսինքն, այս գործընթացի արդյունքում ստացվեց, որ Արթուր Ջանիբեկյանը այնքան լավ տղա է, որ որոշեց ընդառաջ գնալ ժողովրդի իշխանությանը՝ վնասելով իր բիզնեսը, թեպետ ով չգիտի նրա եւ իշխանությունների հարաբերությունների մասին, որն ուղիղ արտացոլումն է գտնում իրեն պատկանող «Արմենիա» հեռուստաընկերությունում, իսկ Վիտյան դառնալ հին Հայաստանից եկած նոր հերոս ու մի թատերական հրապարակում երկօրյա ներկայացումից հետո հայտարարեց, որ դեռ հարց է՝ մյուս սրճարանները կքանդվեն, թե ոչ: Այսինքն մարդը պարզ խոստովանեց , որ խնդիրը մեկ-երկու սրճարաններն էին, եւ հատկապես Ջազվեն, որով ոչ թե էկոլոգիական, այլ քաղաքական հարց է լուծվում: Անի Սահակյան