Պատասխանատվությունից հրաժարվելը կլինի քաղաքական ինքնասպանություն. ըստ ամենայնի, որոշում կա ԼՂ հարցով բանակցությունները շարունակել գործող ֆորմատով. Վիկտոր Սողոմոնյան

Ճիշտ կլինի, որ արցախյան հիմնահարցի կարգավորման շուրջ բանակցեն Ղարաբաղն ու Ադրբեջանը: Այս մասին Tert.am-ի հետ զրույցում ասաց ՀՀ երկրորդ նախագահ Ռոբերտ Քոչարյանի գրասենյակի ղեկավար Վիկտոր Սողոմոնյանը: «Այս ձևաչափը կարտահայտի հակամարտության իրական ֆորմատը: Սա կոնֆլիկտ չէ Ադրբեջանի ու Հայաստանի միջև, սա տարածքային կոնֆլիկտ չէ, ինչպես փորձում է ներկայացնել Ադրբեջանը: Մինսկի խմբի հայտարարությունն այն մասին էր, որ միջնորդները պատրաստ չեն ձևաչափերի փոփոխության: Թյուր կարծիք է, որ Ղարաբաղը մասնակցել է բանակցային գործընթացին այս ֆորմատով, նկատի ունեմ, երբ Ադրբեջանի ու Հայաստանի նախագահները կամ իրենց ներկայացուցիչները կարգավորման վերաբերյալ բանակցություններ են վարել: Դրանց ԼՂ ներկայացուցիչները սկսած 96-97թթ.-ից չեն մասնակցել»,- ասաց Վիկտոր Սողոմոնյանը: Ըստ նրա՝ երբ ԼՂ ներկայացուցիչները մասնակցում էին, Ադրբեջանը բերում էր ադրբեջանական համայնքի ներկայացուցիչներին, փորձում էր ստեղծել քառակողմ ֆորմատ: «Որպես այդպիսին կարգավորման քննարկում ԼՂ ներկայացուցիչների ուղիղ մասնակցությամբ բանակցային սեղանի շուրջ երբևէ չի եղել: Եղել է ոչ ուղղակի, միջնորդավորված բանակցություն: Ստեփանակերտի ներկայացուցիչները հանդիպել են Մինսկի խմբի համանախագահների հետ, Հայաստանի նախագահն էլ տեղյակ է պահել ընթացքի մասին, Ստեփանակերտի տեսակետներն էլ ներկայացրել է»,- նշեց Վ. Սողոմոնյանը: Վերջինս նկատեց, որ կա ռեալ պոլիտիկ, որի ձևակերպումները ներկայացվին ՄԽ կողմից, նրանք ասացին, որ ձևաչափի փոփոխություն այս փուլում նախատեսված չէ, և որ իրենք անելու են ամեն ինչ, որպեսզի պատերազմ չսկսվի: «Կարծում եմ, որ հայկական կողմը ստիպված է լինելու շարունակել բանակցությունները, թեև բազմիցս հայտարարել է, որ հանդիպում են, բայց չեն բանակցում, հանդիպում են, որ որոշեն ֆորմատը: Այս պոպուլիստական հայտարարությունների շրջանակից վարչապետը պետք է դուրս գա, նստի բանակցությունների ու ներկայացնի ԼՂ շահերը: Կարծում եմ, որ ամեն ինչ սրանով է ավարտվելու»,- հավելեց երկրորդ նախագահի գրասենյակի ղեկավարը: Նա նշեց, որ կար երկու տարբերակ՝ կա՛մ համակերպվել իրավիճակի հետ, կա՛մ հրաժարվել պատասխանատվությունից և տուրք տալ պոպուլիզմին: Սողոմոնյանն ասաց, որ պատասխանատվությունից հրաժարվելը կլինի քաղաքական ինքնասպանություն, և ըստ ամենայնի, որոշում կա բանակցությունները շարունակել գոյություն ունեցող ֆորմատով, ստանձնել պատասխանատվությունը: