Զինվոր Կարեն Արտակի Կարապետյանը տան միակ երեխան էր/լուսանկարներ/

Հայկական ժամանակը գրում է. Քաղաք Գյումրի, Դանիելյան փողոց, 34 շենք, բնակարան 1: Այս հասցեում էր ապրում պարտադիր ժամկետային զինծառայող, շարքային գյումրեցի զինվոր Կարեն Արտակի Կարապետյանը, որը երեկ՝ 12.03.2019թ.՝ ժամը 06.50-ի սահմանում N զորամասի պահպանության տեղամասի մարտական դիրքում, մահացու հրազենային վնասվածք էր ստացել: Կարենը ծառայության էր մեկնել 2018 թվականին: Թալիշում էր ծառայում: Տան միակ երեխան էր: Ապրում էր մոր եւ տատի հետ: Փոքր հասակից էր մորն օգնում բոլոր հարցերում՝ տնային գործերից մինչեւ ընտանիք պահելու խնդիրը Կարենին վաղ մանկությունից էր ծանոթ: Դպրոցը չավարտած մոր հետ ՌԴ էր գնացել աշխատելու: Հետո վերադարձել, մեկնել էր ծառայության:Կարենի ազգականները պատմում են, որ ծառայության ընթացքում խնդիրներ չի ունեցել տղան, համենայնդեպս չի եղել այնպիսի իրավիճակ, որ նման ելքը կանխատեսելի լիներ: Պատմում են, որ դեպքի նախորդ երեկոյան զանգել, մոր հետ խոսել է, ուրախ է եղել: Կատարվածն անակնկալի է բերել բոլորին: Դեպքի մասին Կարենի ազգականները ոչինչ չգիտեն, բացի եղած պաշտոնական տեղեկատվությունից: Հիշեցնենք, որ դեպքի առթիվ երրորդ կայազորային քննչական բաժնում ՀՀ քրեական օրենսգրքի 104-րդ հոդվածի 1-ին մասով հարուցվել է քրեական գործ, կատարվում է նախաքննություն: Կարեն Արտակի Կարապետյանի մահվան դեպքով ձերբակալվել է զինծառայող։