Մեզ ոչ ոք Երևանի այլ հատվածում տարածք չի առաջարկել․ «Օպերային» հարակից սրճարանի սեփականատեր

Մենք պահանջում ենք՝ մեզ մի քանի ամիս ժամանակ տան՝ աշխատենք, որից հետո մենք ինքներս կապամոնտաժենք մեր սրճարանները, կկանաչապատենք և կհանձնենք քաղաքապետարանին։ Tert.am-ի հետ զրույցում այս մասին ասաց «Ատլանտիս Գարդեն» սրճարանի սեփականատեր Էլիզաբեթ Ղազարյանը։ «Մենք մեր տարածքի ծառերը չենք հատել, նույնիսկ մեր սրճարանի վերևի հատվածն այնպես ենք սարքել, որ ծառերին չխանգարեն։ Կոնկրետ մեր սրճարանի հարակից մասերում մենք 33 ծառ ենք տնկել։ Իսկ երբ ստորգետնյա ավտոկայանատեղին սարքեցին, էդ օդից ծառերը սկսեցին չորանալ։ Հիմա մենք դրանք չենք տալու քաղաքապետարանին, ավելի լավ է կտրենք»,- նշեց սրճարանի սեփականատերը։ Նրա խոսքով՝ իրենք գիշերային ժամերին նաև Ազատության հրապարակում անվտանգություն են ապահովում. «Մեր սրճարանի շուրջ ամեն օր կռիվներ են անում, ո՛չ ոստիկանություն կա, ո՛չ մի բան։ Մենք հսկում ենք էդ տարածքը, արձանների վրա բարձրացող մարդկանց ենք հանում։ Ո՞ւմ է դա հետաքրքիր։ Մենք ընդամենը վերաբերմունք ենք ուզում»։ Tert.am-ի դիտարկմանը, թե քաղաքապետի մամուլի խոսնակ Հակոբ Կարապետյանը ֆեյսբուքյան իր էջում գրել էր, որ քաղաքապետարանը պատրաստ է աջակցել սրճարանների սեփականատերերին, որ վերջիններս քաղաքի այլ մասերում շարունակեն գործունեությունը, Էլիզաբեթ Ղազարյանը նկատեց․«Ստում են։ Էսօր ինչ-որ մեկն ինձ մոտեցավ, հարցրեց՝ Օղակաձև այգում մեզ առաջարկե՞լ են տարածք։ Ասում եմ՝ մեզ ոչ ոք ոչինչ չի առաջարկել։ Եթե քանդվում են Օպերայի հարակից սրճարանները, Օղակաձև այգու սրճարաններն էլ պետք է ապամոնտաժվեն։ Մամուլի խոսնակի խոսքերը ոչ մի իրավական ուժ չունեն։ Նա օրեր առաջ հեռուստատեսային հաղորդման ժամանակ խոստացավ, որ պետք է հանդիպում կազմակերպի քաղաքապետի հետ, բայց ոչ մի հանդիպում էլ չեղավ»։ Հարցին՝ եթե քննարկման արդյունքում կայացված որոշումը չբավարարի, ի՞նչ քայլերի եք դիմելու, Ղազարյանը շեշտեց․ «Չենք թողնելու՝ քանդեն։ Ո՛չ ես, ո՛չ իմ աշխատակիցները, ո՛չ էլ մյուս սրճարանների սեփականատերերն ու աշխատակիցները չենք թողնելու, որ քանդեն»։ Նշենք, որ այս պահին Երևանի քաղաքապետարանում ընթանում է քննարկում՝ Օպերայի հարակից տարածքի սրճարանների ներկայացուցիչների մասնակցությամբ։ Քննարկումը լրագրողների համար փակ է։ Հիշեցնենք, որ Այսօր Երևանի քաղաքապետարանը սկսել է ապամոնտաժել Օպերայի մերձակայքում գործող որոշ սրճարաններ և սրճարանների որոշ հատվածներ: Սա ապամոնտաժման առաջին փուլն է: Քաղաքապետարանի այս որոշմանը դեմ են ապամոնտաժվող սրճարանների սեփականատերերը և աշխատակիցները, որոնք բողոքի ակցիա էին իրականացնում՝ պահանջելով դադարեցնել գործողությունը։ 2019-ի սկզբին Ազատության հրապարակին հարող հատվածում քաղաքի սեփականությունը հանդիսացող հողամասերը վարձակալած և սրճարանային բիզնես ծավալած տնտեսվարողները քաղաքապետարանի համապատասխան ստորաբաժանումից ծանուցում էին ստացել, որով առաջարկվում էր նրանց հրաժարվել վարձակալության իրավունքով տրամադրված հողամասերի մի մասից: Սեփականատերերն իրենց հերթին նշում են, որ բիզնես գործունեության ծավալման համար կնքված պայմանագրերը չեն ավարտվել: