Հակոբ Արշակյանի համար հարցը սկզբունքային է դրված

ԱԺ-ում «Աջակողմյան ղեկային տեղաբաշխմամբ տրանսպորտային միջոց­ների ներմուծումն արգելելու մասին» Հայաստանի Հանրապետության օրենքում փոփո­խու­թյուն կատարելու մասին» նախագծի քննարկմանը,ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը տեղեկացրեց,որ ՀՀ մաքսային տարածքներում տեղակայված աջ ղեկային տեղաբաշխմամբ տրանսպորտային միջոցները, ինչպես նաև այն աջակողմյան ղեկային տեղաբաշխմամբ տրանսպորտային միջոցները, որոնք ձեռք են բերվել մինչ 2018-ի դեկտեմբերի 30-ը, առաջարկվող նախագծով կարող են Հայաստան ներմուծվել մինչ այս տարվա մայիսի 1-ը: Դրանից հետո օրենքում փոփոխություն այլևս չի լինելու: «ՀՀ մաքսային տարածքում տեղակայված աջ ղեկային տեղաբաշխմամբ տրանսպորտային միջոցները, ինչպես նաև այն աջակողմյան ղեկային տեղաբաշխմամբ տրանսպորտային միջոցները, որոնք ձեռք են բերվել մինչ 2018-ի դեկտեմբերի 30-ը, ՀՀ տարածք կարող են ներմուծել մինչև այս տարվա մայիսի 1-ը»,-նշեց Արշակյանը: ԱԺ փոխնախագահ Ալեն Սիմոնյանը նկատեց` նշված ժամկետներից հետո հնարավոր է, որ լինեն քաղաքացիներ, ովքեր ցանկանան մեքենաներ ներմուծել: «Ես ուզում եմ մեկ անգամ ևս շեշտել, որ այս որոշումից հետո ժամկետների փոփոխություն չի լինելու»,- ասաց նա: Հակոբ Արշակյանը նշեց` հարցը սկզբունքային է դրված: «Մենք ընդամենը փորձում ենք կուտակված ավտոմեքենաների հարցը լուծել և նախկին օրենքի հետ կապված թյուրըմբռնումների արդյունքում իրավիճակային լուծում տալ: Հետևաբար, դրանից հետո, օրենքի որևէ փոփոխություն չի նախատեսվում»,-եզրափակեց նախարարը: