Փաշինյանի շոկն ու Ալիևի պահած գաղտնիքը
Պաշտոնական Բաքուն ողջունում է ԵԱՀԿ Մինսկի խմբի համանախագահների հայտարարությունը, Ադրբեջանում այն որակում են՝ ազդակ Հայաստանի համար։ Ադրբեջանի արտգործնախարարության մամուլի խոսնակ Լեյլա Աբդուլաևայի պաշտոնական մեկնաբանություն է ներկայացրել: «Մինսկի խմբի հայտարարությունն ազդակ է Հայաստանի համար, և մենք ողջունում ենք դա: Նախագահ Իլհամ Ալիևն՝ ընդունելով համանախագահներին, ներկայացրել է մեր երկրի դիրքորոշումը: Հակամարտության կարգավորման շուրջ բանակցություններն ընթանում են Հայաստանի և Ադրբեջանի միջև: Բանակցությունների ձևաչափը մնում է անփոփոխ»,- ասել է ԱԳՆ խոսնակը: Հիշեցնենք, որ Հայաստանի և Ադրբեջանի ղեկավարների առաջիկայում սպասվող հանդիպմանն ընդդառաջ եռանախագահները կողմերին հորդորել էին «զերծ մնալ հայտարարություններից ու գործողություններից, որոնք ենթադրում են տեղում իրադրության փոփոխություն, նախապես որոշում են ապագա բանակցությունների արդյունքը կամ ստեղծում են նախապայմաններ, առանց մյուս կողմի համաձայնեցման պահանջում են ձևաչափի միակողմանի փոփոխություն, կամ ցույց են տալիս պատրաստակամություն՝ վերսկսելու ռազմական գործողությունները»: Բնականաբար որոշակի հաղթանակ համարելով, Ադրբեջանը ուշադրություն է հրավիրում համանախագահների հայտարարության՝ իրենց դուրեկան հատվածները, ինչը կանխատեսելի էր: Մի քանի ամիս Փաշինյանը հայտարարում էր, որ Արցախին բանակցությունների սեղանին պետք է վերադարձնել՝ այժմ համանախագահներն, այսպես ասած՝ սառը ցնցուղի էֆեկտով, հիշեցրեցին նրան, որ պետք է իջնել «ամպերից»: Սակայն Բաքուն էլ իր հերթին մտածված անտեսում է ԵԱՀԿ Մինսկի խմբի համանախագահների տարածած հայտարարության իր համար ոչ դուրեկան հատվածները: Օրինակ, միջնորդները նաև հավելել էին, որ «շարունակելու են քննարկել համապատասխան խնդիրները հակամարտության հետևանքներն ուղղակիորեն կրող կողմերի հետ՝ ընդունելով այն, որ բանակցային գործընթացի հաջողության համար անհրաժեշտ է հաշվի առնել նրանց տեսակետները և մտահոգությունները»: Այսինքն, խոսքը վերաբերում է միջնորդների՝ Ստեփանակերտ այցելություններին և Արցախի իշխանությունների հետ հանդիպումներին: Բացի այդ, մեկ այլ կարևոր դրվագ, որի մասին Ադրբեջանում ծպտուն չեն հանում: Համանախագահներն իրենց հայտարարությունում վկայակոչել են Հելսինկիի եզրափակիչ ակտի սկզբունքները՝ շեշտելով, որ խնդրի արդար ու տևական կարգավորումը պետք է հիմնված լինի ուժի կամ ուժի սպառնալիքի չկիրառման, տարածքային ամբողջականության և հավասար իրավունքների ու ժողովուրդների ինքնորոշման սկզբունքների վրա: Այս մասին որևէ բառ չեն խոսում Ադրբեջանում, մինչդեռ ուժի կամ ուժի սպառնալիքի չկիրառման, ինչպես նաև՝ հավասար իրավունքների ու ժողովուրդների ինքնորոշման սկզբունքների մասին հիշատակումը հայկական կողմի համար ձեռնտու կետեր են: Մետաքսյա Շալունց
Հետևեք մեզ Viber-ում
