Կարգին քաղաքապետի մանր կոմպլեքսները

Երեւանի քաղաքապետ Հայկ Մարությանն այս տարի խախտել է նախկին քաղաքապետերի սովորույթը եւ մինչ այս պահը մարտիության շնորհավորանք չի հղել։ Ավելին՝ նա չի պահպանել ավանդույթը, որի համաձայն՝ ամեն տարի այս օրը Երեւանի քաղաքապետարանի ավագանու կին անդամներին քաղաքապետի անունից ծաղիկներ եւ շնորհավորական բացիկներ էր ուղարկվում։ Այս մասին հաստատում են նաեւ ընդդիմադիր խմբակցության պատգամավորները: Փաստորեն, Հայկ Մարությանը ոչ միայն կարգին քաղաքապետ չէ, այլ չենք սխալվի ասել՝ մարդ, առավել եւս տղամարդ: Անգամ Տարոն Մարգարյանն էր կարողանում հաղթահարել բարդույթները եւ իր բմբուլները քամուն տվող ընդդիմադիր ավագանիների նկատմամբ հարգալից վերաբերմունք դրսեւորել: Չի բացառվում, որ այս հայտարարությունից հետո քինախնդիր այս իշխանությունում որոշ պաշտոնյաներ նորից կոկորդները ճղեն՝ արգելելով նախկիննեի հետ որեւէ համեմատություն: Կներեք, բայց դուք անգամ նախկիններին չեք ձգում ու եկել է այն պահը, որ այդ նախկինները պետք է վիրավորվեն իրենց ձեզ հետ համեմատելու համար: Այս իշխանության գալուստսահակյանը՝ նույն ինքը՝ Լենա Նազարյանը պարգեւատրումների թեմայով արդարանում էր, թե ամեն ինչ եղել է նախկին իներցիայով, հեղափոխական իշխանությունները շարունակել են նախկինների ավանդույթը: Գուցե կարգին քաղաքապետն էլ շարժվեր նախկին իներցիայով: Չնայած Կարգին Հայկոյի դեպքում ահագին բարդ է հասկանալը, թե որն է նախկինը՝ ազիզյանական միմոսություններն ու էժանագին կարգին հաղորդումները, թե՞… Պետական կառավարմանն անտեղյակ մարդը բախտի բերումով դարձել է քաղաքապետ ու պարզվում է, որ ոչ միայն քաղաք կառավարելուց է հեռոու, այլեւ մարդկային հարաբերությունները չի հարգում, առավել եւս հակառակ սեռի նկատմամբ վերաբերմունք չունի: Այս մարդու մի քանի ամսվա պաշտոնավարումը նշանավորվել միայն կասկածելի գործարքներով եւ աղմկահարույց որոշումներով: Թանկարծեք տոնածառից սկսած վերջացրած «ԿամԱԶ»-ների ձեռքբերման սկանդալային պատմությունը: Հիշեցնենք, որ դրանք ձեռք են բերվել «մեկ անձից ուղիղ գնում» անելով, եւ յուրաքանչյուր մեքենայի համար շուկայական գնից մոտ 15 միլիոն դրամ ավել վճարելով՝ այդ մեկ գնումով միայն բյուջեին մոտ 135 միլիոն դրամի վնաս է հասցրել Հայկ Մարությանը։ Երեւանի 2019-ի տոնածառն էլ գնվեց մեկ անձից՝ ուղիղ գնումով, 70 միլիոն դրամով։ Կարելի է ենթադրել, որ քաղաքապետի ուշքն ու միտքը կասկածելի գնումներ կազմակերպելն է , բնականաբար դրանից օգուտներ քաղելը: Խեղճը, էլ ոնց հիշեր կանանց ու նրանց տոնը: Անի Սահակյան