Վարչապետը նախկիների հետքերով. ձեռքով կթված կաթն ու գործիքով կթված կաթը

Կառավարության այսօրվա նիստում քննարկվեց և ընդունվեց Հայաստանի Հանրապետության կառավարության 2018 թվականի հուլիսի 19-ի N 893-Լ որոշման մեջ փոփոխություններ և լրացումներ կատարելու մասին որոշման նախագիծը: Նախագիծը վերաբերում է ՀՀ ագրոպարենային ոլորտի սարքավորումների ֆինանսական վարձակալության լիզինգի աջակցության ծրագրին: ՀՀ գյուղատնտեսության նախարար Գեղամ Գևորգյանը նշեց, որ ծրագրի շրջանակներւմ ֆինանսական կառույցների կողմից ընդունվել է 30 տնտեսվարողի լիզինգի տրամադրման հայտեր շուրջ 1.8 միլիարդ դրամի չափով, որից հաստատվել է արդեն 8 հայտ: Վարչապետ Նիկոլ Փաշինյանը հետաքրքրվեց՝ սա կոնկերտ գյուղացիներին ինչ հնարավորություն է տալիս: «Սա շատ կարևոր է, որովհետև ձեռքով կթված կաթն ու այդ գործիքով կթված կաթը տարբեր գների ու արժեքների ապրանքներ են, ընդ որում, տարբերությունը էական է: Շատ կարևոր է կթելուց հետո կաթի պահպանման ջերմաստիճանը: Այս պայմաններում ստացած կաթը արտադրության մեջ ունի բոլորովին այլ նշաձող, քան՝ ավանդական եղանակով ստացած կաթը, հույս ունենք, որ այս հնարավորություններից մեր հայրենակիցները կօգտվեն», - ասաց Նիկոլ Փաշինյանը: Գեղամ Գևորգյանը տեղեկացրեց նաև, որ սահմանամերձ գյուղերում այս ծրագիրը կգործի զրո տոկոսով: