Հույս ունեմ` գազի գնի հարցն այս տարի կլուծվի. Փաշինյանը` ТАСС-ին
ՀՀ վարչապետ Նիկոլ Փաշինյանը հույս է հայտնել, որ Ռուսաստանի Դաշնությունից մատակարարվող գազի գնի հարցը կհաջողվի կարգավորել 2019թ. ընթացքում:Այս մասին Փաշինյանը նշել է ՏԱՍՍ գործակալությանը տված հարցազրույցում՝ նշելով, որ դրա վերաբերյալ բանակցություններն ընթացքի մեջ են: « Հույս ունեմ, որ այս տարվա ընթացքում մեզ կհաջողվի լուծել այդ հարցը, քանի որ այն կարևոր է ոչ միայն ՌԴ-ի հետ երկկողմ հարաբերությունների զարգացման, այլև ԵԱՏՄ-ի համար: Չէ՞ որ ԵԱՏՄ-ի նպատակն է միասնական տնտեսական տարածության ստեղծումը»,ասել է նա: ՀՀ վարչապետը նշել է, որ այդ միասնական տնտեսական տարածության ստեղծման համար հարկավոր է, որ էներգակիրների գները, որոնք շատ կարևոր մասնաբաժին ունեն ապրանքի ինքնարժեքի կառուցվածքում, հավասար լինեն, միմյանց մոտ լինեն: « Որովհետև, եթե, օրինակ` մեկ ապրանքի ինքնարժեքը էներգակիրների արժեքների պատճառով Հայաստանում լինի ավելի բարձր, քան, օրինակ, Բելառուսում, Ռուսաստանում և Ղազախստանում, ապա այն, ըստ էության, կհարվածի ԵԱՏՄ գաղափարին»,-ասել է Փաշինյանը: Վարչապետը նշել է, որ այս հարցը քննարկվում է ոչ միայն ռուս գործընկերների հետ, այլ նաև ԵԱՏՄ միջկառավարական ու բարձրագույն տնտեսական խորհուրդների նիստերում ու այլ ձևաչափերում:
Հետևեք մեզ Viber-ում
