Պահուստների տատանողականությունը կրում է սեզոնային բնույթ, և ամսական կտրվածքով դիտարկելը սխալ է. ԿԲ խոսնակը՝ ԿԲ պահուստների մասին

Միայն ամսական կտրվածքով դիտարկում անել ու դրա վրա որոշակի վերլուծություններ և եզրակացություններ անելը սխալ է: Tert.am-ի հետ զրույցում ասաց Կենտրոնական բանկի մամուլի խոսնակ Հարութ Կբեյանը՝ անդրադառնալով 168 ժամի այն հրապարկմանը, որ Կենտրոնական բանկի պահուստները դիտարկվում են, և մեկ ամսում դրանք պակասել են 255 մլն դոլարով: «Պահուստների դինամիկան ճիշտ է դիտարկել տարվա կտրվածքով, և եթե դիտարկենք անցած տարվա դինամիկան, ապա կտեսնենք, որ անցած տարի էլ եղել է, որ պակասել է, և ավելացել են: Այդ դինամիկան պայմանավորված է մի շարք հանգամանքներով»,-ասաց նա: Կբեյանի խոսքով՝ շատ անգամ պահուստների տատանողականությունը կրում է սեզոնային բնույթ, երբ խոշոր կազմակերպություններն իրենց առևտրաշրջանառության պայմանավորվածության շրջանակներում դրսից ծառայություններ, ապրանքներ , սարքավորումներ են գնում, և նույնը փոխադարձ գնում են նաև մյուս հոսքերը: «Եվ դրա վրա դիտարկում անել և ասել, որ պակասել են պահուստները, սխալ է, դա կրում է սեզոնային բնույթ, և անհանգստանալու անհրաժեշտություն դրանից չկա»,-ասաց նա: