Ցանկալի կլիներ, որ Մարտի 1-ը փակելով անցնեին Հոկտեմբերի 27-ի բացահայտմանը. Արմեն Սարգսյան

«Ցանկալի կլիներ, որ իշխանությունները Մարտի 1-ը փակելով անցնեին Հոկտեմբերի 27-ի բացահայտմանը »,-Վազգեն Սարգսյանի 60-ամյակի առիթով «Եռաբլուր» զինվորական պանթեոնում հիշատակի եւ ոգեկոչման արարողությունից հետո լրագրողների հետ զրույցում ասաց սպարապետի եղբայր Արմեն Սարգսյանը։ Ինչպես էր Սպարապետը նշում իր ծննդյան օրը,հարցրեցին լրագրողները,  Արմեն Սարգսյանը պատասխանեց. «Վազգեն Սարգսյանը առհասարակ չէր սիրում իր ծննդյան օրը, հիմնականում վերջին տարիներին ծննդյան օրը առավոտյան իր մարզանքից հետո իր հինավուրց, պատերազմի բոհով անցած մի քանի ընկերների հետ գալիս էին «Եռաբլուր»։ Երկար էին մնում  «Եռաբլուր»ում, պտտվում էին, յուրաքանչյուր զինվորի, մարտական ընկերոջ կողքով անցնելով ծաղիկներ էին դնում, ապա վերջում որեւէ տեղ նստում, տղաների հետ խմում էին ու գալիս էր «Երկրապահ», որտեղ տղաների հետ նշում էին, ապա երեկոյան 7-8-ին գալիս էր տուն, որովհետեւ ծնողները սպասում էին, բայց պաշտոնապես իր ծնունդը նշել չէր սիրում»։ Լրագրողները հետաքրքրվեցին՝ տանը չէին հորդորո՞ւմ Սպարապետին ամուսնանալ, ընտանիք կազմել, որին ի պատասխան սպարապետի եղբայրը հիշեց. «Այս հարցը մեր տան մեջ գլխավոր թեման էր, բայց քանի որ այնքան էր ասվել, այնքան էր ծամծմվել, որ արդեն իրեն նյարդայնացնում  էր, փորձում էինք որեւիցե մեկս չշոշափել, իհարկե, ես ու Արամը չէինք ասում առհասարակ, բայց երբեմն–երբեմն հայրս էր ջղայնանում, ասում էր՝ վերջիվերջո թոռներ պարգեւեք, կատակի տալով այդ հարցը այդպես էր քննարկվում»։