Վանեցյանը Դավիթ Սանասարյանի սերը տվեց իր բուռը
Պետական վերահսկողական ծառայության երկու աշխատակիցների ձերբակալությունը եւ ԱԱԾ հաղորդագրությունը այդ միջադեպի վերաբերյալ, փոթորկել է ներիշխանական անդորրը: Վերահսկողականի աշխատակիցները ձերբակալվել են պաշտոնական դիրքը չարաշահելու եւ հոմոդիալիզի սպասարկման բիզնեսով զբաղվող ընկերությանը՝ շուկայից ապօրինաբար դուրս մղելու կասկածանքով: ԱԱԾ-ն այս գործի վերաբերյալ այնպիսի մանրամասներ է հայտնել, որ այլեւս կասկած չի հարուցում վարչապետի ենթակայության տակ գտնվող երկու պաշտոնյաների գործողությունների անօրինության փաստը: <<Ծառայության շահերին հակառակ օգտագործելով իրենց պաշտոնեական դիրքը, 2018-2019թթ. ընթացքում ապօրինի կերպով միջամտել են վերահսկվող օբյեկտների՝ ՀՀ առողջապահության նախարարության և մի շարք բժշկական կենտրոնների կարիքների համար անհրաժեշտ բժշկական սարքավորումների ձեռքբերման նպատակով կազմակերպված գնման ընթացակարգերին` նպատակ ունենալով հայտարարված մրցույթներում ապահովել իրենց կողմից հովանավորվող առևտրային կազմակերպության հաղթանակը: Ընդ որում, գնման գործընթացներին մասնակցող ծառայողների կողմից ապօրինի պահանջները կատարելուն ընդդիմանալու դեպքում, ՀՀ պետական վերահսկողական ծառայության պաշտոնատար անձինք սպառնացել կամ փաստացի նախաձեռնել են ուսումնասիրություններ>>: Մինչդեռ ՊՎԾ-ի տնօրեն Դավիթ Սանասարյանը հայտարարում է, որ նրանց ձերբակալումը դեռ չի նշանակում, որ այդ մարդկանց պետք է մեղադրել ինչ-որ գործարքի մեջ եւ որ նրանց մեղքը դեռ պետք է ապացուցվի: Սանասարյանը ԱԱԾ-ի իր գործընկերներին կոչ է անում նախաքննական փուլում պահեն գաղտնիությունը. «Որեւիցե մուտիլովկաներով հայտնի մարդկանց ձեռքում չպետք է հայտնվեն նման ինֆորմացիաները»: Դավիթ Սանասարյանը վստահեցրեց, որ գործով ձերբակալվածներ Սամվել Այդյանն ու Գեւորգ Խաչատրյանը Պետական վերահսկողական ծառայության լավագույն աշխատակիցներից են: Եթե ավելի պարզ, Սանասարյանը բացահայտ մեղադրում է Արթուր Վանեցյանին նախաքննական գաղտնիքները <<սլիվ>> անելու եւ անմեղության կանխավարկածը խախտելու հարցում : Դավիթ Սսանասարյանն ամենայն հավանականությամբ փորձ է անում դիմակայություն մտցնել ԱԱԾ-վարչապետ հարաբերություններում՝ ցույց տալով, որ ԱԱԾ-ն առաջ է անցել իրադարձությունների զարգացումներից ու չի հարգել անգամ վարչապետի ենթակայության տակ գործող կառույցի աշխատակիցների անմեղության կանխավարկածը: Սակայն ԱԱԾ-ի կողմն ուղղված մեղադրանքներից առաջ արժե հիշել բումերանգի կանոնները, համաձայն որոնց ինչ-որ պահից դու կարող ես հայտնվել քո գործողությունների ծուղակում: Միգուցե Դավիթ Սանասարյանը մոռացել է, թե ինչպես է պաշտոնում հայտնվելու առաջին իսկ օրից գործունեության հարթակ դարձրել Ֆեյսբուք սոցիալական ցանցը ու կառույցի ստուգումների ընթացքում նույն հարթակում ներկայացրել որպես կատարված հանցագործություններ, այդ բոլոր տեքստերը եզրափակելով <<Սիրում եմ բոլորիդ>> նախադասությամբ: Հիշենք մի շարք համայնքապետարաններում ՊՎԾ-ի ստուգայցերը եւ զորօրինակ Ուրցաձորի համայնքապետին հրաժարականի պարտադրումը: Հիշենք ԵՊՀ-ում իրականացվող ստուգումները եւ հայտարարություններն առ այն, որ Արամ Սիմոնյանը աղմկահարույց չարաշահումներ է գործել: Սա այն պարագայում, երբ չկա դատարանի որոշում ու ապացուցված չէ որեւէ մեկի մեղքը: Եւ առհասարակ ,Նիկոլ Փաշինյանի իշխանությամբ սկիզբ դրվեց անմեղության կանխավարկածի ինստիտուտի հիմնահատակ ոչնչացումը, երբ մինչեւ բուն քննչական գործողություններին անցնելը ,վարչապետի մակարդակով բարձր ամբիոններից խոսվում է <<դարի հանցագործությունների>> մասին: Այնպես որ, պարոն Սանասարյան, բնավ էլ չենք սպասում ու ԱԱԾ հաղորդագրությունն ու գործողություններն ընդունում ենք ի գիտություն եւ ապացույցն այն բանի, որ ձեր իշխանությունում կոռուպցիան ու ապօրինությունները ոչ թե ստորին օղակներում են, ինչի մասին հայտարարում է վարչապետը, այլ ամենաբարձր՝ վարչապետի ենթակայության տակ գտնվող կառույցի մակարդակով: Անի Սահակյան
Հետևեք մեզ Viber-ում
