Նոր «դոզա» ՊԵԿ նախագահից

Հանրությունը դեռ չէր հասցրել մարսել պետական ապարատի, հատկապես ՊԵԿ-ում գլխապտույտ առաջացնող պարգեւավճարների թեման, սակայն ՊԵԿ նախագահ Դավիթ Անանյանը որոշել է նոր «դոզա» ապահովել։ Հիշեցնենք, որ Անանյանը մոտ 8 միլիոնի հասնող պարգեւավճար էր ստացել, երեկ «Ազատության» հետ զրույցում նեղսրտել է իրենց ուղղված քննադատություններից մոտավորապես այսպես, թե հանրությունը պետք է հասկանա, թե իրենք ինչ «սուրբ» գործ են անում եւ պետք է «արժանապատիվ, արժանավայել» աշխատավարձ ստանա․«Ես կարծում եմ, որ ընդհանրապես պետական ծառայությունում կամ հանրային ծառայությունում մենք պետք է խնդիր բարձրացնենք և արժանավայել, արժանապատիվ վաստակի հարցը կարգավորենք։ Ես կարծում եմ, որ բոլորի աշխատավարձը պետք է բարձր լինի, և եթե մենք նախորդ տարիներին մեր արտաբյուջետային միջոցներից հնարավորություն ենք ունեցել այդ եկամուտները արժանապատիվ մակարդակի հասցնել, ապա մենք, կարծում եմ, որ ճիշտ ուղղության վրա ենք եղել։ Համաձայն եմ, որ ոչ պակաս կարևոր մասնագիտություններ կան: Ուղղակի մի փոքր կա տարբերություն՝ պետական բյուջեն մեր գրպանն է, որտեղից վարձատրվում են բոլոր պետական ծառայողները։ Պետական եկամուտների պարագայում հարկ վճարողը կամ հարկ հավաքագրողը անմիջականորեն եկամուտ հավաքագրողն է և անմիջականորեն գտնվում է հարկատուի հետ շփման մեջ: Եվ այս դեպքում է, որ մենք ունենք վերահսկողության ավելի մեծ ռիսկ» , - մասնավորապես ասել է Անանյանը։ Իհարկե, ոչ միայն պետական ապարատում պետք է մարդը ստանա արժանապատիվ աշխատավարձ, այլեւ՝ առհասարակ։ Սակայն այս իրավիճակում, երբ ՊԵԿ-ի միլիոնների հասնող թվերին զուգահեռ ունենք ուսուցիչներ, պոլիկլինիկայի բժիշկներ, որոնց միջին աշխատավարձը մոտավորապես 120-150 հազար դրամ է կազմում, սա լավագույն դեպքում, ՊԵԿ-ի աշխատակիցներին վեր դասել մնացյալից, պարզապես անբարոյականություն է։ Ուսուցիչները, որոնք սերունդներ են կրթում ու կերտում տարբեր ոլորտի մասնագետներ, բժիշկները, որոնք կյանքեր են փրկում ու դա անում են նշված գրոշներով, ինչով են մեղավոր, որ պետական բյուջեն իրենց գրպանում չէ ու փողի հոտն այնքան մոտիկից չեն գայթակղվում փողի հոտով ու ախորժակներն էլ չի մեծանում դրանից։ Բայց սա դեռ ամենը չէ, ըստ Անանյանի՝ իրենք հատկապես 2018-ին պետք է ավելի բարձր աշխատավարձ եւ պարգեւավճար ստանային, թե որ արժանիքի համար, միայն իրեն է հայտնի․․«Եթե պարգևատրում, ապա նախորդ տարիների համեմատ բարձր պետք է լիներ 2018 թվականի պարգևատրումները։ Եթե համեմատենք, կարծես թե նախորդ տարիների համեմատ չափերը էականորեն չեն տարբերվում, ուղղակի 18 թվականի պետական բյուջեով նախորդ տարիների համեմատ շատ ավելի միջոցներ են նախատեսված եղել պարգևատրումների համար»։ Ինչպես Փաշինյանը կասեր՝ դուք ինչ եք արել պետության ու ժողովրդի համար, որ մի հատ էլ ավել վարձատրություն եք պահանջում։ Հեղափոխությունից հետո ՊԵԿ-ում, հատկապես, ոչ միայն հին ավանդույթներ են շարունակվում, այլեւ դրանք մի քանի անգամ կատարելագործվել են։ Իսկ ՊԵԿ-ը ընդամենը դարձել է քաղաքական գործիք ու Նիկոլ Փաշինյանի հրահանգով պարբերաբար մահակ է ծառայում այս կամ այն ընկերության գլխին։ Սակայն ՊԵԿ-ի վազքը հասնում է մինչեւ այնտեղ, որտեղ սկսվում է հարկադրաբար կուլակաթափությունը, իշխանական գրպանը մեծանալու պրոցեսը։ Սրան զուգահեռ հարկային եւ մաքսային մարմիններում Փաշինյանի եւ իր տիկնոջ հարազատներն են նստած ու տնօրինում են բոլոր  սխեմաները։ Այնպես որ այս պայմաններում խոսել արժանապատիվ աշխատավարձերի մասին, պարզապես անթույլատրելի է։ Անի Սահակյան