Հերթը հասավ Արայիկ Հարությունյանին
«Ժողովուրդ» թերթը գրում է, որ իր տեղեկություններով` այսօր ՀՀ կրթության և գիտության նախարար Արայիկ Հարությունյանը կհանդիպի «Իմ քայլը» խմբակցության պատգամավորներին։ Սա գործադիր-օրենսդիր իշխանության ներկայացուցիչների հերթական հանդիպումն է: Ընդ որում, հատկանշական է այն փաստը, որ այս հանդիպմանը հնարավոր է ներկա չգտնվեն «Իմ քայլի» առանցքային դեմքերը՝ խմբակցության ղեկավար Լիլիթ Մակունցի գլխավորությամբ:
Թերթը հիշեցնում է, որ ԱԺ նախագահ Արարատ Միրզոյանի գլխավորած պատվիրակությունն աշխատանքային այցով փետրվարի 25-ից 27-ը մեկնել է Մոսկվա: «Ժողովուրդ» օրաթերթի տեղեկություններով` սա այս շաբաթվա միակ հանդիպումը չի լինելու։
Մինչև շաբաթվա վերջ խմբակցությունը ծրագրում է հանդիպել նաև ՀՀ ոստիկանապետ Վալերի Օսիպյանին և տարածքային կառավարման և զարգացման նախարար Սուրեն Պապիկյանին։
«Պատգամավորները մեզ հետ մասնավոր զրույցներում նշում էին, թե հատկապես սպասում էին ՀՀ ոստիկանապետի հետ հանդիպմանը՝ չնայած այն վարչապետին կից կառույց է», - գրում է թերթը:
Հետևեք մեզ Viber-ում
